Çinlə Filippin arasında gərginlik: Rəsmi Manila təhlükəsizliyi artırdı
Filippin Müdafiə Nazirliyi hərbçilərə Cənubi Çin dənizində ölkəsinin nəzarətində olan strateji ada yaxınlığında mübahisəli sularda Çinin şübhəli fəaliyyətləri ilə əlaqədar təhlükəsizliyi gücləndirməyi tapşırıb.
AFN.az Filippin mediasına istinadən xəbər verir ki, Çinin ada yaxınlığında hərbi hərəkətliliyi bu dövlətin narahatlığına səbəb olub. Müdafiə Nazirliyi Paqasa adası yaxınlığında Çinin şübhəli fəaliyyətinin aşkar edildiyini bildirərək, Cənubi Çin dənizindəki hərbi varlığını gücləndirmək qərarına gəlib.
Nazirlik Çinin hansı fəaliyyətlə məşğul olduğu barədə məlumat verməsə də, Pekin bu iddiaları “əsassız” adlandırıb.
Pekin Çinin mübahisəli Spratli adalarında fəaliyyətlə məşğul olduğunu bildirir. Filippin MN isə öz açıqlamasında ölkənin 200 millik eksklüziv iqtisadi zonasında hər hansı bir müdaxilənin və ya mülkiyyətin geri alınmasının “Paqasa adasının təhlükəsizliyinə təhdid yaratdığını" bildirib. Qurum adanı "Filippinin suveren ərazisinin bir hissəsi" adlandırıb. "Biz Çini qaydalara əsaslanan beynəlxalq asayişi qorumağa və gərginliyi artıra biləcək hərəkətlərdən çəkinməyə şiddətlə çağırırıq", - deyə nazirliyin bəyanatda deyilir.
Paytaxt Maniladakı səfirliyi Çinin qaydalara əməl etdiyini bildirib. O, Filippin Müdafiə Nazirliyinin bəyanatını belə şərh edib: "Hər iki ölkə dəniz məsələlərini dostluq məsləhətləşmələri vasitəsilə müvafiq qaydada həll edəcək".
Çin hər il milyardlarla dollar dəyərində malların keçdiyi Cənubi Çin dənizinin böyük hissəsinə iddialıdır. Bruney, Malayziya, Filippin, Tayvan və Vyetnamın da müxtəlif ada və ərazilərdə iddiaları var.
Spratil adalarına gəldikdə isə yaşayış üçün yararsız olan bu mərcan adaları strateji mövqelərinə görə Cənubi Çin dənizində hərbi əhəmiyyət kəsb edir.
Çinin bu adalardan birində hərbi baza qurduğu daha əvvəl peyk fotoşəkilləri ilə müəyyən edilmişdi.
