Çavuşoğlu İsveç haqda: FETÖ üzvləri üçün cazibə mərkəzi olmağa davam edir
Türkiyənin xarici işlər naziri Mövlud Çavuşoğlu İsveçin xarici işlər naziri Tobias Billström ilə birgə mətbuat konfransı keçirib.
AFN.az "Anadolu"ya istnadən xəbər verir ki, Çavuşoğlu, terrorçuluqla əlaqəli cinayətkarların ekstradisiyası və terrorçuların aktivlərinin dondurulması ilə bağlı bir irəliləyiş olmadığını deyib. Eyni zamanda bildirib ki, Türkiyə müdafiə sənayesi şirkətləri İsveçdən bəzi məhsulların idxalı ilə bağlı lazımi müsbət cavab almayıblar: "Biz İsveç və Finlandiyanın təhlükəsizlik narahatlıqlarını başa düşürük. Biz NATO-nun açıq qapı siyasətini tam dəstəkləyirik. Nəhayət, biz Türkiyənin Madriddən gözləntilərini açıq şəkildə ifadə etdik. Biz də danışıqların başlanmasını təsdiqlədik. Amma bunun həyata keçirilməsi də vacibdir. Biz İsveç və Finlandiyanın xahişi ilə birgə mexanizm yaratdıq.
O vaxtdan bəri hər iki ölkə irəliləyiş əldə edib. Biz bundan məmnunuq. Atılan addımları da qeyd edirik. Onlar yeni ildən qüvvəyə minəcək konstitusiyalarına dəyişikliklər edirlər. Bu addımlar son dərəcə müsbətdir. Həmkarımın PKK/PYD-dən uzaq olması ilə bağlı açıqlamaları da son dərəcə əhəmiyyətli idi. Bunlar düzgün istiqamətdə atılan addımlardır, lakin xüsusilə terrorla əlaqəli cinayətkarların ekstradisiyası və terrorçuların aktivlərinin dondurulması ilə bağlı konkret inkişaf yoxdur. Bu həftə FETÖ-çünün ekstradisiyası tələbi rədd edildi ki, bu da çox mənfi haldır. Terror əlaqələri olan şəxslərin ekstradisiyası ilə bağlı əlavə addımların atılması bizim ən təbii gözləntimizdir. İsveç FETÖ üzvləri üçün cazibə mərkəzi olmağa davam edir.
Atılmalı çoxlu addımlar var. Müqavilə bunu aydın şəkildə göstərir. Biz konkret addımlar görməliyik. Müdafiə sənayesi şirkətlərimiz İsveçdən bəzi məhsulların idxalına lazımi müsbət cavabı almayıb. Həmkarımla ikitərəfli əməkdaşlığı da müzakirə etdik. Biz ikitərəfli əməkdaşlığımızı inkişaf etdirmək istəyirik. Bununla bağlı müzakirələrimiz oldu. İsveç şirkətlərinin də marağını görürük. Biz turizm sahəsində də əməkdaşlığımızı artırmaq istəyirik. Belə görünür ki, ilin sonuna qədər isveçli turistlərin sayı 400 mini keçəcək".
