Yeni metrostansiyanın açılması ətraf ərazilərdə satışa çıxarılan obyektlərin qiymətinə təsir edib
Xocəsən qəsəbəsində yeni metrostansiyanın açılması ətraf ərazilərdə satışa çıxarılan torpaq sahələri ilə yanaşı, fərdi evlərin və obyektlərin də qiymətinə təsir edib.
AFN.az xəbər verir ki, bu barədə report-a açıqlama verən Azərbaycan Qiymətləndiriclər Cəmiyyətinin (AQC) sədri Vüqar Oruc sözügedən ərazidə qiymətlərdə dəyişiklik beş il öncə bu layihənin icrasına başlanılandan sonra qeydə alındığını bildirib.
Onun sözlərinə görə, “Xocəsən” metrostansiyasının sərnişinlərin istifadəsinə verildikdən sonra ərazidəki daşınmaz əmlakların qiymətlərində 20-25% artım olacağı gözlənilir:
“Sözügedən stansiyanın açılışı təkcə Xocəsən qəsəbəsində deyil, həm aşağı Sulutəpə adlanan əraziyə, həm də Ekologiya postu və onun ətrafında yerləşən daşınmaz əmlakların qiymət artımına səbəb olub. Müsbət amillər ondan ibarətdir ki, bu metrostansiyanın açılışından sonra “Avtovağzal” stansiyasının yükü azalacaq, “20 Yanvar” metrostansiyası və “Şamaxinka” adlanan ərazilərdəki tıxaclar azalacaq. Yəni “Xocəsən” metrostansiyanın açılışı bu ərazilərdə olan tıxacların azalmasına ciddi təsir edəcək”.
V.Oruc stansiyanın açılışının təkcə Xocəsən ərazisində deyil, həm də nəqliyyat infrastrukturunun formalaşmasının ardından Müşfiqabad, Hökməli və Atyalı qəsəbələrində də yerləşən daşınmaz əmlakların qiymətlərinə təsir edəcəyini qeyd edib.
AQC-nin sədri hesab edir ki, qiymət artımı əsasən Sulutəpə və Xocəsən ərazisinə təsir göstərəcək: "Buna təkcə metrostansiyanın açılışı deyil, həm də ora gedəcək avtobusların təyin edilməsi təsir edir. Bunlar tənzimləndiyi halda Müşfiqabad, Hökməli və Atyalı ərazilərində də, müəyyən qiymət artımı müşahidə edilə bilər. Metrostansiya yaxınlığında nəqliyyat infrastrukturu normal şəkildə qurularsa, sözügedən ərazilərdə ciddi qiymət artımları olacaq. Metrostansiyanın açılışından sonra “Xocəsən” ərazisindəki torpaqlar 10-15% civarında, kommersiya obyektləri 20-25%, həmin ərazidə yerləşən fərdi yaşayış evləri isə 20% bahalaşacağı gözlənilir. Sulutəpə ərazisində stansiyanın açılışından əvvəl torpaq sahələrinin sotu 1 000-2 000 manat idi, hazırda bu qiymətlər 3 000-3 500 manat civarında dəyişir”.
V.Oruc “Xocəsən” metrostansiyasının açılışının eyni zamanda “Sədərək” və “Binə” ticarət mərkəzlərinə gedişləri də asanlaşdıracağını və bu ərazidə yerləşən obyektlərində qiymətlərinin artacağını qeyd edib.
Qeyd edək ki, dekabrın 23-də Bakı Metropoliteninin “Xocəsən” stansiyasının və “Xocəsən” elektrik deposunun açılışı olub. Stansiya Lökbatan qəsəbəsi və “Sədərək” Ticarət Mərkəzi istiqamətindən hərəkət edən vətəndaşların nəqliyyat problemlərinin aradan qaldırılmasında mühüm rol oynayacaq.
Sərnişinlər "Avtovağzal" stansiyasından "8 Noyabr" stansiyasına, eləcə də "Xocəsən" stansiyasına gediş-gəliş həyata keçirə bilərlər. Bugünki dövr üçün ərazidə yaşayan sakinləri sayı nəzərə alınaraq qatarların ilkin intervalı 16 dəqiqə təyin edilib.
