Misirin XİN başçısı son on ildə ilk dəfə Suriya və Türkiyəyə səfər edəcək
Misirin xarici işlər naziri Sameh Şükri fevralın 27-də Suriya və Türkiyəyə rəsmi səfərə gedəcək.
“Report” xəbər verir ki, bu barədə Afrika ölkəsinin Xarici İşlər Nazirliyinin rəsmi nümayəndəsi Əhməd Əbu Zeyd feysbukda bildirib.
XİN-in rəsmisi Şükrinin Misir xalqının “iki ölkə və qardaş xalqları ilə həmrəy olduğunu” bildirmək istədiyini qeyd edib:
“Xarici işlər nazirinin Suriya və Türkiyədə keçirəcəyi görüşlərdə Misirin iki ölkənin təbii fəlakətdən zərər çəkmiş bölgələrində zərərçəkənlərə yardım və dəstək olmağa hazır olduğunu təsdiq edəcəyi gözlənilir”, - paylaşımda bildirilib.
Qeyd edək ki, Misir XİN başçısının bu ölkələrə səfəri son on ildə ilk olacaq.
