Uqandada məktəbə hücum olub: azı 25 nəfərin öldüyü bildirilir
Uqanda polisi Konqo sərhədi yaxınlığında məktəbə hücum nəticəsində azı 25 nəfərin öldüyünü bildirib.
AFN.az-ın "Associated Press"ə istinadən məlumatına görə, polisin bəyanatında deyilir ki, Demokratik Qüvvələrin Alyansı (ADF) cümə günü gecə saatlarında sərhəddə yerləşən Mpondve şəhərində bir məktəbə hücum edib. Orta məktəb Konqo sərhədindən təxminən 2 kilometr aralıda yerləşir.
"Yataqxana yandırılıb, ərzaq anbarı talan edilib. İndiyədək 25 cəsəd məktəbdən çıxarılaraq Bwera xəstəxanasına çatdırılıb", - məlumatda deyilir, daha 8 nəfərin vəziyyətinin ağır olduğu bildirilir.
Bəyanatda həmçinin qeyd olunur ki, Uqanda hökumət qüvvələri Konqo ərazisində hücum edənlərin izinə düşüb.
Həlak olanların hamısının tələbə olub-olmadığı hələlik məlum deyil.
Yerli qəzet "Daily Monitor" adı açıqlanmayan təhlükəsizlik mənbələrinə istinadən bildirir ki, hücumçular bir neçə nəfəri özləri ilə qaçırıblar.
Müttəfiq Demokratik Qüvvələr və ya ADF son illərdə mülki şəxslərə qarşı çoxsaylı hücumlar həyata keçirməkdə ittiham olunur.
ADF uzun müddətdir ki, 1986-cı ildən hakimiyyətdə olan ABŞ-ın təhlükəsizlik müttəfiqi olan Uqanda prezidenti Yoveri Museveninin hakimiyyətinə qarşı çıxıb.
