Qeyri-hökumət təşkilatı satın aldığı 2000 kərgədanı təbiətə buraxacaq
Cənubi Afrikadakı bir qeyri-hökumət təşkilatı (QHT) ölkədə dünyanın ən böyük kərgədan fermasını satın aldığını və 2000 cənub ağ kərgədanını təbiətə buraxacağını açıqlayıb.
Yohannesburqda yerləşən Afrika Parkları təşkilatı verdiyi yazılı açıqlamada ölkənin Botsvana sərhədində iflas ərəfəsində olan "Platinum Rhino" fermasını satın aldığını açıqlayıb.
Açıqlamada layihə çərçivəsində 7800 hektarlıq fermada yaşayan 2000 ağ kərgədanın 10 il ərzində mərhələli şəkildə təbiətə qaytarılacağı bildirilib.
Qeyri-hökumət təşkilatı fermada kərgədan yetişdirmə fəaliyyətinə də son qoyacağını bildirib.
20-ci əsrin əvvəllərində nəsli kəsilməkdə olan cənub ağ kərgədanlarının sayı 2012-ci ildə mühafizə tədbirləri sayəsində 20.000-ə çatıb. Ancaq ovçuluq fəaliyyətlərinə görə bu rəqəm bu gün 13 minə qədər azalıb.
Hazırkı kərgədan populyasiyasının 80 faizinin yaşadığı Cənubi Afrikada yüzlərlə kərgədan yüksək qiymətli buynuzlarına görə hər il brakonyerlərin hədəfinə çevrilir.
Asiya ölkələrindən, xüsusən də Çindən böyük tələbat olan qeyri-qanuni kərgədan buynuzu ticarəti nəsli kəsilməkdə olan kərgədan növləri üçün ciddi təhlükə yaradır.
