Mərakeşdə zəlzələ nəticəsində ölənlərin sayı 800-ü ötdü
Mərakeşdə baş vermiş 6,8 bal gücündə zəlzələ nəticəsində ölənlərin sayı 800-ü ötüb.
"Associated Press" xəbər verir ki, xilasedicilər axtarışları davam etdirirlər, ölənlərin sayının artması ehtimalı böyükdür.
Mərakeşdə 12-ci əsrdə tikilmiş məşhur Koutoubia məscidi zərər görüb. Hadisənin miqyası hələ məlum deyil. Məscidin 69 metrlik minarəsi “Mərakeşin damı” kimi tanınır.
Mərakeşin Daxili İşlər Nazirliyindən verilən açıqlamada bildirilib ki, zəlzələnin episentrinə yaxın olan Mərakeş və beş əyalətdə ən azı 820 nəfər ölüb, daha 672 nəfər yaralanıb. Nazirlik yaralananlardan 205-nin ağır yaralandığını bildirib.
Mərakeş ordusu və fövqəladə hallar xidmətləri dağıntıların vurduğu ərazilərə kömək etmək üçün səfərbər olub, lakin zəlzələ mərkəzinin ətrafındakı dağlıq bölgəyə aparan yollar nəqliyyat vasitələri ilə tıxanıb və dağılmış qayalarla doludur, bu da xilasetmə işlərini ləngidir.
