Moldovada Beynəlxalq Sağlamlıq Turizmi Forumu keçirilib
Moldova Respublikasının paytaxtı Kişinev şəhərində Moldova Respublikası Səhiyyə Nazirliyinin himayəsi altında ABŞ-ın Beynəlxalq İnkişaf Agentliyinin strateji tərəfdaşlığı ilə Moldova Tibbi Turizm Şurasının təşkilatçılığı ilə (İHTF-2023 ) Beynəlxalq Sağlamlıq Turizmi Forumu keçirilib.
Ölkəmizi bu tədbirdə Azərbaycan Sağlamlıq və Termal Turizmə Dəstək Assosiasiyasının (AHTTSA) prezidenti, Azərbaycan Sahibkarlar Konfederasiyasının Rəyasət Heyətinin üzvü Ruslan Quliyev təmsil edib. Bu barədə AFN.az-a R.Quliyev bildirib.
Moldovanın İqtisadi İnkişaf və rəqəmsallaşma naziri, Baş nazirin müavini Dumitru Alaiba, mədəniyyət naziri Serjiu Prodan, ABŞ-ın Beynəlxalq İnkişaf Agentliyinin direktor müavini John Riordan, Dünya Sağlamlıq Turizm Şurasının qurucu prezidenti Emin Çakmak və Moldova Tibbi Turizm Şurasının prezidenti doktor. Natalia Chobanu iştirak etdi. İclaslara GTHC Müşahidə Şurasının sədri Yunus Gürkan rəhbərlik edib.
Qlobal Sağlamlıq Turizmi Şurasının prezidenti Əhməd Savaşan iştirakçılara GHTC-nin cari faəliyyəti haqqında geniş məlumat verib.
Sonra forum öz işini panel müzakirələrlə davam etdirib. Panellərdə əsasən qanunvericilik, səhiyyə əməkdaşlığının gücləndirilməsində qht-lərin rolu, ürək-damar xəstəliklərinin və diş problemlərinin idarə edilməsində mükəmməllik, səhiyyənin optimallaşdırılmasında beynəlxalq təşkilatların rolu kimi vacib mövzulara toxunulub.
Forumdan sonra Qlobal Sağlamlıq Turizmi Şurasının qapalı toplantısı keçirilib.Toplantıda 2024-cü ildə həyata keçiriləcək layihələrlə bağlı geniş fikir mübadiləsi həyata keçirilmiş və Qlobal Sağlamlıq Turizmi Şurasının zirvə toplantısına hazırlıqla bağlı bir sıra təkliflər irəli sürülüb.
Tədbirin sonuncu günü iştirakçılar üçün Moldovada fəaliyyət göstərən 10-na yaxın sağlamlıq turizmi müəssisələrinə tanışlıq turu təşkil edilib.
Qeyd edək ki, quruma 2018-2019-cu illərdə Azərbaycan rəhbərlik edib.
