Britaniya ABŞ və Polşanın Ukraynaya güclü dəstəyini davam etdirəcəyinə inanır
Böyük Britaniyanın müdafiə naziri Qrant Şapps hesab edir ki, ABŞ və Polşa qarşıdan gələn seçkilərlə bağlı daxili təzyiqlərə baxmayaraq, Ukraynaya güclü dəstəyini davam etdirəcək.
AFN.az xəbər verir ki, bu barədə "Reuters" məlumat yayıb.
Nazir Şapps əmin edib ki, Britaniya digər ölkələrdə baş verən hadisələrdən asılı olmayaraq Kiyevi dəstəkləməyə davam edəcək.
Həftə sonu hökumətin qaçılmaz bağlanmasının qarşısını almaq məqsədi daşıyan ABŞ büdcə razılaşmasına Ukraynaya yardım daxil olmayıb və oktyabrın 15-də yeni parlamenti seçən Polşa Kiyevə yeni silah tədarükünə artıq razılıq verməyəcəyini, ancaq öz silah ehtiyatlarını yenidən quracağını bildirib.
Bazar günü Böyük Britaniyanın Polşaya dörd "Tayfun" təyyarəsi göndərəcəyini açıqlayan Şapps deyib ki, seçkilər zamanı Ukraynaya dəstəklə bağlı hər hansı gərginliyin gündəmə gələ biləcəyini başa düşmək olar, lakin Polşaya verilən dəstək indiyədək "əla" olub.
O, Mühafizəkarlar Partiyasının konfransında keçirilən tədbirdə deyib: “Mən həqiqətən ümid edirəm və inanıram ki, orada seçkilər keçirildikdən və işlər yoluna qoyulduqdan sonra məntiqli və sağlam düşüncəli yanaşma olacaq”.
