İndoneziyada vulkan püskürməsi səbəbindən 6500 nəfər təxliyə edilib
İndoneziyanın Şərqi Nusa Tengqara əyalətinin Şərqi Flores bölgəsində Levotobi Laki-Laki vulkanının davam edən püskürmələri səbəbindən təxminən 6500 insan təxliyə edilib.
Səlahiyyətlilər bir müddətdir aktiv olan Levotobi Laki-Laki vulkanının dünəndən bəri 40 dəfə püskürdüyünü açıqlayıb.
Flores adasında 6500 insanın təxliyə edildiyini qeyd edən rəsmilər insanları vulkanın ətrafındakı 4 kilometrlik ərazidən uzaq durmağa çağırıblar.
Can itkisi və dağıntının olmadığı bildirilir.
Təxliyə qərarı İndoneziyanın şərqindəki Flores adasındakı dağlarda həftələrlə davam edən vulkanik fəaliyyətdən sonra verilib.
Yanvarın 1-də İndoneziyada Levotobi Laki-Laki vulkanı aktivləşdikdən sonra qadın və uşaqlar da daxil olmaqla 1172 sakin təxliyə edilib.
Vulkanın püskürməsindən sonra yanvarın 10-da ən yüksək səviyyəli həyəcan siqnalı verilib.
