ABŞ İsrailə on milyonlarla dollar dəyərində bombalar göndərməyi planlaşdırır
İsrail Qəzzanın cənubundakı Rəfah şəhərinə hücuma hazırlaşarkən, ABŞ rəhbərliyi İsrailə on milyonlarla dollar dəyərində minlərlə bomba və sursat göndərməyi planlaşdırır.
Bu haqda "Wall Street Journal" (WSJ) qəzeti yazıb.
ABŞ rəsmi dairələrinin məlumatına əsaslanan xəbərdə, İsrailə göndəriləcək silahların tədarükündə hər biri təxminən min ədəd olmaqla MK-82 tipli bomba, KMU-572 hücum sursatları və FMU-139 bomba qoruyucularının olduğu qeyd edilib.
Xəbərdə silahların on milyonlarla dollar dəyərində olduğu təxmin edilərək, göndərişin hələ də ABŞ rəhbərliyi tərəfindən araşdırıldığı və Bayden rəhbərliyi təslimatı Konqresə təqdim etməzdən əvvəl detallarının dəyişə biləcəyi vurğulanıb.
Xəbərdə silah tədarükü planının İsrailin bir milyondan çox insanın sığındığı Rəfaha hücum planları zamanı gəldiyinə diqqət çəkilərək, "İsrail hökumətinin regional təhdidlərə görə bu silahları tez bir zamanda almaq istədiyi" ifadə edilib.
Qəzet İsrailin Qəzzaya hücumlarının başladığı 7 oktyabrdan bəri ABŞ-ın Təl-Əviv rəhbərliyinə təqribən 21 min dəqiq idarəolunan sursat verdiyini və İsrailin onların yarısından istifadə etdiyini qeyd edib.
