Rusiyada sel fəlakəti - Fövqəladə vəziyyət elan edildi
Rusiyada sel fəlakəti baş verib. Daşqınlardan zərər çəkmiş ərazilərdə fövqəladə vəziyyət elan edilib. Daşqın nəticəsində 4 nəfərin həyatını itirdiyi bildirilib.
Rusiya hökuməti Orenburqda daşqınlardan zərər çəkmiş ərazilərdə fövqəladə vəziyyət elan edib.
Regional hökumət Ural çayında suyun səviyyəsinin qalxması nəticəsində yaranan daşqınların 885-i uşaq olmaqla 4 mindən çox insanın təxliyə edildiyini bildirib.
Dövlət xəbər agentliyi Tass bölgədə daha 2000 evin su altında qaldığını və ümumi sayın təxminən 6300-ə çatdığını bildirib.
Rusiyanın fövqəladə hallar naziri Aleksandr Kurenkov xilasetmə işlərini yoxlamaq üçün bu gün daşqından ən çox zərər çəkən şəhərlərdən biri olan Orska gedib.
Orsk meri Vasili Kozupitsa bildirib ki, Qazaxıstan sərhədindən 20 kilometr şimalda yerləşən Orsk ötən cümə günü bəndin uçmasına səbəb olan daşqınlardan ən çox zərər çəkən şəhər olub.
Burada bəndin aşması nəticəsində həyatını itirənlərin sayı 3-ə yüksəlib.
Su bəndinin sıradan çıxmasına səbəb ola biləcək şübhəli tikinti pozuntularını araşdırmaq üçün cinayət işi başlanıb.
