NATO rəhbəri: Nüvə silahlarının yerləşdirilməsi zonasını genişləndirmək planımız yoxdur
NATO-nun baş katibi Yens Stoltenberq çərşənbə axşamı Varşavaya səfəri zamanı Şimali Atlantika Alyansının nüvə silahlarının yerləşdirilməsi zonasını genişləndirmək planının olmadığını bildirib.
"Amerikanın səsi" xəbər verir ki, Stoltenberq Britaniyanın baş naziri Rişi Sunak ilə birgə mətbuat konfransında deyib: “Heç bir NATO ölkəsində daha çox nüvə silahı yerləşdirmək planları yoxdur”.
Stoltenberq və Sunak Polşada ingilis qoşunlarının yerləşdiyi yerə baş çəkiblər.
Britaniya hökumətinin başçısı bildirib ki, London müdafiə xərclərini ÜDM-in 2,5%-nə qədər artırmağı planlaşdırır, bu da NATO rəhbərliyinin Qərb hərbi blokuna üzv dövlətlər üçün bəyan etdiyi müdafiə xərcləri hədəfini belə üstələyir.
Rişi Sunakın Polşaya səfərindən əvvəl Britaniya Nazirlər Kabineti ölkənin Ukraynaya 500 milyon funt sterlinq məbləğində bu günə qədər ən böyük yardım paketini açıqlayıb.
Ukrayna ilə həmsərhəd olan Polşa prezidenti Anjey Duda bu həftənin əvvəlində Nyu-Yorka səfərindən qısa müddət sonra bildirib ki, Varşava NATO müttəfiqlərinin Polşa ərazisində nüvə silahı yerləşdirməsinə açıqdır.
