Belçikada 119 illik rekord qırılıb
Belçikada güclü yağış və tufan səbəbindən ölkənin bir çox bölgəsində "narıncı xəbərdarlıq" elan edilib.
Belçikanı yay günlərindən çox payız kimi hiss etdirən bir neçə buludlu və aşağı temperatur günündən sonra paytaxt Brüsseldə güclü yağış və tufanlar hökm sürür.
Belçika Kral Meteorologiya İnstitutu (RMI) yerli vaxtla saat 16.00-dan 23.00-dək Haynaut, Namur, Liege, Vallon Brabant, Flaman Brabant, Limburq və Antverpen, eləcə də Brüssel bölgəsində göy gurultusu ilə əlaqədar narıncı xəbərdarlıq elan edib.
Bölgədə sürəti saatda 90 kilometri keçən güclü külək əsərkən, paytaxtda yolları və tunelləri su basıb.
Brüsseldə su basan Porte de Hal, Vleurqat və Bailli tunelləri iki istiqamətdə, Cinquantenaire və Loi tunelləri isə mərkəzi istiqamətdə nəqliyyatın hərəkətinə bağlanıb.
Güclü yağış səbəbindən tramvay xətlərinin hərəkəti pozulub, avtobusların hərəkət istiqaməti dəyişdirilib.
"Belqa" xəbər agentliyinin məlumatına görə, leysan Brüssel bölgəsində dəmir yolu hərəkətinə də mənfi təsir göstərib. Etterbeekdə ağacların yola düşməsi səbəbindən Huizingen ilə Beersel və Holleken ilə Nivelles arasında nəqliyyatın hərəkəti dayandırılıb.
Günün ikinci yarısında güclənən yağışlar zamanı tufan və daşqın təhlükəsi ilə əlaqədar Daxili İşlər Nazirliyi tərəfindən 1722 yanğınsöndürmə briqadasının qaynar xətti aktivləşdirilib. Bildirilib ki, paytaxtda yanğınsöndürmə briqadaları indiyədək 50 müdaxilə edib və 150-dən çox köməyə çağırışa baxıb.
Əlverişsiz hava şəraitinə görə yerli vaxtla saat 17:00-dan etibarən Brüsseldə parklar və meşələr ziyarətçilər üçün bağlanıb.
Belçikada yağıntılar 2023-cü ilin oktyabr ayından etibarən mövsümi normalardan artıqdır. İyun ayı normadan artıq yağıntının qeydə alındığı ardıcıl 9-cu ay olub.
Beləliklə, 1905-ci ilin yağış rekordu, martdan oktyabr ayına qədər ardıcıl 8 ay ərzində orta səviyyədən yuxarı yağıntılar qeydə alınıb.
