Merkel: Miqrantların mənşə ölkələrində problemlərin həllinə dəstək olmaq lazımdır
Almaniyanın keçmiş kansleri Angela Merkel hesab edir ki, qeyri-qanuni miqrasiya problemini təkcə milli səylərlə həll etmək olmaz.
Onun fikrincə, bu, yalnız qonşu ölkələrlə məsləhətləşmələr yolu ilə həll edilə bilən Avropa işi olaraq qalır. Merkel bu barədə "Rheinische Post"a açıqlamasında bildirib. Siyasətçinin sözlərinə görə, problem ilk növbədə miqrantların mənşə ölkələrindədir. O, hesab edir ki, həmin ölkələrin yoxsulluğu və geriliyi ilə mübarizə aparmaq lazımdır.
2024-2025-ci illərdə miqrantlar tərəfindən törədilən zorakı cinayətlərin sayının artması fonunda Almaniyada miqrasiya qanunvericiliyinin sərtləşdirilməsinin zəruriliyi ilə bağlı müzakirələr alovlanıb. Xüsusilə, fevralda keçirilən növbədənkənar parlament seçkilərində qalib gələn Xristian Demokrat və Xristian Sosial Birlik (CDU/CSU) blokunun proqramına sərhədlərdə uzunmüddətli nəzarətin təmin edilməsi və ölkəni tərk etməli olan şəxslərin ardıcıl surətdə deportasiyası bəndi yer alıb. CDU/CSU lideri və Almaniya kanslerliyinə namizəd Fridrix Merz də bəyan edib ki, o, qalib gələrsə, hökumət başçısı kimi ilk iş günündə Daxili İşlər Nazirliyinə qonşu dövlətlərlə sərhədlərdə nəzarətin qurulmasını əmr edəcək.
