İsraildə yeni hökumətlə bağlı məsləhətləşmələr noyabrın 4-də başlayacaq
İsrail prezidenti İshak Hersoq noyabrın 4-dən etibarən parlament seçkilərində qalib gələn və yeni Knessetə daxil olan partiyaların liderləri ilə yeni hökumətin formalaşdırılması məsələsini müzakirə edəcək.
AFN.az xəbər verir ki, bu barədə İsrail prezidentinin administrasiyası məlumat yayıb.
Bildirilib ki, noyabrın 1-də prezident administrasiyasının baş direktoru Eyal Şviki seçkilərdə qalib gələn bütün partiyaların rəhbərlərinə müvafiq dəvətlər göndərib.
Şviki prezidentin iqamətgahının bütün fraksiyaların üzünə açıq olduğunu bildirib. Onun sözlərinə görə, Hersoq partiya nümayəndələrinin məsləhətləşmələrə açıq fikir və dialoqa hazır şəkildə qatılmasını, yeni seçkilərin qarşısını almaq üçün ortaq mövqelərin axtarılmasını gözləyir. Görüşlərin onlayn yayımlanacağı da qeyd olunub.
Məsləhətləşmələrin yekununda prezident parlamentə daxil olan partiyalardan birinin liderinə yeni hökuməti formalaşdırmağı tapşırmalıdır. Bir qayda olaraq, ilk namizəd ən çox mandat qazanan partiyanın rəhbəri olur. Lakin prezident parlamentdə birinci yeri tutmayan, amma sabit çoxluğu bir araya gətirmək imkanına malik siyasətçiyə də bu səlahiyyəti verə bilər.
Xatırladaq ki, oktyabrın 27-də İsraildə keçirilən parlament seçkilərində heç bir siyasi qüvvə hökuməti təkbaşına formalaşdırmaq üçün kifayət qədər mandat qazana bilməyib. Bülletenlərin 100 faizi hesablandıqdan sonra hazırkı baş nazir Benyamin Netanyahunun rəhbərlik etdiyi sağçı “Likud” partiyası 120 yerlik Knessetdə 27 mandatla birinci olub. Qadi Ayzenkotun rəhbərlik etdiyi əsas müxalifət qüvvəsi “Yaşar” isə 21 mandat qazanıb.
“Likud” və onun ultra-sağçı, dini müttəfiqlərindən ibarət blok parlamentdə 53 yer əldə edib. Birləşmiş müxalifətin 48 mandatı var. Ərəb partiyaları isə ümumilikdə 19 yer qazanıb. Bununla belə, nə “Likud”, nə də müxalifət bu partiyalarla koalisiyaya girməyə hazır olduğunu açıqlayıb. Yeni hökumətin formalaşdırılması üçün 61 mandat tələb olunur.
Baş nazir postuna ilk namizədə hökuməti qurmaq üçün 28 gün vaxt veriləcək. Zərurət yaranarsa, bu müddət daha iki həftə uzadıla bilər. Namizəd uğursuz olarsa, prezident bu səlahiyyəti başqa deputata həvalə edəcək və ona 14 gün vaxt ayrılacaq. Heç bir namizəd sabit koalisiya formalaşdıra bilməsə, 90 gün sonra növbədənkənar seçkilər keçiriləcək.
Yeni hökumət and içənədək Benyamin Netanyahu İsrailin baş naziri vəzifəsini icra etməyə davam edəcək.
