Aqil Acalov: "Azərbaycan və çeçen xalqlarının münasibətləri tarixlə sınanıb"
Avrasiya Kombat Ciu-Citsu Federasiyasının prezidenti, ictimai xadim Aqil Acalov Moskvada yaşayan çeçen və azərbaycanlıların arasında yaranmış münaqişə ilə əlaqədar fikir bildirib. AFN onun açıqlamasını təqdim edir:
"Əziz və dəyərli azərbaycanlı və çeçen müsəlman dostlar, qardaş və bacılar!
Azərbaycan və Çeçenistanı bir-birinə tarixi, uzunmüddətli və daimi dostluq və əməkdaşlıq əlaqələri bağlayır.
Moskvada baş vermiş insident Rusiyada yaşayan iki nüfuzlu qardaş xalqın arasını vurmaq və bununla da millətlərarası qarşıdurma yaratmaq cəhdi idi. Buna yol vermək olmaz! Çünki biz Qafqaz adlı vahid, rahat və isti evdə yaşayan, bu böyük sivilizasiyanın və mədəniyyətin, iki xalqın qardaşlıq və dostluq əlaqələrinin varisləyirik.
Azərbaycan və çeçen xalqlarının əlaqələri tarixlə sınanmışdır və nümunəvi xarakter daşıyır. Azərbaycan Respublikasının prezidenti İlham Əliyevlə Çeçenistan Respublikasının prezidenti Ramzan Kadırovun şəxsi dostluq münasibətləri və onların ötən ilin sonunda baş tutmuş görüşlərində bildirdikləri fikirlər bunun bariz nümunəsidir.
Ümumilikdə, azərbaycanlılar bütün qafqaz xalqlarının əsrlər boyu formalaşmış tarixini və dəyərlərini yüksək qiymətləndirir və hər zaman onları müdafiə etməyə çalışırlar."
