Osloda Nəriman Həsənzadə və Baba Vəziroğlu ilə görüş
Osloda Həftəsonu Məktəbində -"Mənim dilim-Ana dilim" layihəsinin qonaqları Xalq şairi, İstiqlal və Şərəf ordeni ilə təltif olunmuş, hər birimizin çox böyük sevgi ilə şeirlərini dinlədiyimiz Nəriman Həsənzadə və Əməkdər incəsənət xadimi, Şöhrət ordeni ilə təltif edilmiş, nəğməkar, sevilən şair Baba Vəziroğlu olub.
AFN xəbər verir ki, Norveçdə fəaliyyət göstərən Azərbaycan Evinin sədri Ramil Əliyevin AFN-ə verdiyi məlumata görə, görüş çox maraqlı keçib: “Belə ki, tanınmış və sevilən şairlərimizin ifasında, bir-birindən mənalı, vətənpərvər ruhlu, gözəl şeirlər səslənib və Ana dili haqqında fikir mübadiləsi olub. Xalq şairi Nəriman Həsənzadənin 90 illik yubileyi münasibəti ilə şagirdlərimiz, müəllim, valideyn və qonaqlarımız onu təbrik edib, şairin Azərbaycan poeziya tarixində əvəzolunmaz rolu olduğunu bildiriblər. Yazdığı hər bir şeirdə zəngin bədii üslubla yanaşı, Ana dilini düzgün və səlis bir formada oxuculara təqdim edən N.Həsənzadə yaradıcılığı hər zaman sevilib və seviləcək. Nəriman Həsənzadənin şeirlərinin ölkəmizin hüdudlarından kənarda sevilməsinin əsas səbəbi şairin dilinin axıcılığı, sadəliyi və seçdiyi mövzuların oxucuların qəlbinə yaxın olmasıdır. Şairin şeirlərinin Norveçdə də sevilməsinin əsas səbəbi Nəriman müəllimin şəxsiyyətindəki səmimiliyin onun yaradıcılığına təzahürüdür. N.Həsənzadə görüşdə çox sevilən «Nərdivan» şeirini və «Nuru Paşa» poemasından bir hissəsini və başqa bir sıra şeirlərini şagirdlərimiz üçün səsləndirib və dünyanın hər bir yerində Ana dilinin öyrənilməsinin, uşaqların vətənpərvərlik ruhunda tərbiyə olunmasının vacibliyini vurğulayıb”.
O da vurğulandı ki, nəğməkar şair Baba Vəziroğluda görüşə qatılıb və Osloda Ana dili məktəbinin fəaliyyətinin diqqətəlayiq olduğunu bildirib: “Nəriman Həsənzadə ilə birlikdə görüşdə olduğundan məmnun qalan B.Vəziroğlu yaradıcılığında Nəriman müəllimdən bəhrələndiyini bildirib. B.Vəziroğlu yaradıcı insanların əsas həyat amalının yazıb yaratmaq və oxuculara dəyərli ədəbi əsərlər təqdim etmək olduğunu bildirib və görüşdə hər birimizn sevə-sevə dinlədiyimiz «Heç nə istəmirəm», « Ömrün fəsilləri», « Xatirədir» şeirlərini səsləndirib. B. Vəziroğlunun şeirlərindəki düzgün söz, ifadə və obraz seçimi şairin yaradıcılığını sərhədsiz edir və dünyanın hər yerində sevilir. Məktəbimizin Ana dili müəlliməsi Arzu Rzayeva yaradıcılıqlarına vurğun olduğu Nəriman Həsənzadə və Baba Vəziroğlu ilə görüşün şagirdlərimiz üçün çox dəyərli olduğunu bildirib. A.Rzayeva qeyd edib ki, hər iki şairin yaradıcılığındakı Vətən, ana və dil sevgisi şagirdlərimizi ana dilimizlə yanaş, ədəbi dilimizidə öyrənməyə həvəsləndirəcək. Şagirdlərimiz dəyərli şairlərimizdən ilham alaraq şeirlər söyləyib və qonaqlarımıza suallar veriblər. Onu da qeyd edim ki, Yevlax rayonu Nizami Gəncəvi adına Malbinəsi tam orta məktəbindən görüşə qoşulmuş ibtidai sinif müəlliməsi İnarə Cəfərovanın və onun şagirdləri Aylan Süleymanlının və İnci Əliyevanın maraqlı çıxışları və söylədiyi şeirlər tədbir iştirakçıları və şagirdlərimiz tərəfindən maraqla qarşılanıb”.
NİGAR
