Gürcüstanda bir aydır itkin düşən azərbaycanlılın yaxınları aksiya keçirib
Gürcüstanın Saqareco bələdiyyəsinin azərbaycanlılar yaşayan Yormuğanlı kəndində aksiya keçirilib.
AFN.az Report-a istinadən xəbər verir ki, yerli sakinlər bir ay bundan öncə itkin düşmüş həmkəndliləri 42 yaşlı Nazim Nəbiyevin bu günədək tapılmamasına etiraz ediblər.
Aksiya iştirakçıları hüquq-mühafizə orqanlarını fəaliyyətsizlikdə günahlandırıblar. Onların sözlərinə görə, polis axtarışları davam etdirdiyini bildirsə də, indiyədək heç bir nəticə yoxdur.
Xatırladaq ki, N.Nəbiyev yanvarın 4-də Qardabani bələdiyyəsinin Qaracala kəndinə gedib. O, mal-qara almaq üçün üzərində 32 min lari pulla Kaspi rayonuna yollanmağa hazırlaşırdı. Yaxınları onun itkin düşməsini pulla əlaqələndirirlər.
