Rusiya İsveç və Finlandiyanı hədələdi: NATO-ya üzv olmağa cəhd etsəniz...
Finlandiya prezidenti Sauli Niinisto ABŞ prezidenti Co Baydenlə Ağ Evdə görüşüb və o, müdafiə sahəsində əməkdaşlığı gücləndirmək barədə razılığa gəlib.
Qaynarinfo Reuters-ə istinadla xəbər verir ki, görüşdən sonra Finlandiya prezidenti jurnalistlərə Finlandiyanın NATO-ya üzvlük meyarlarına cavab verdiyini bildirib.
"İsveçdəki kimi Finlandiyada da vəziyyət dəyişib. Sorğulara əsasən, insanların əksəriyyəti ilk dəfədir ki, NATO-ya üzv olmağın tərəfdarıdır. Biz bunu parlamentlə müzakirə etməyə hazırıq", - Niinisto Fox News-a müsahibədə deyib.
Onun sözlərinə görə, Alyansa daxil olmaq barədə yekun qərarı parlament verəcək.
Xatırladaq ki, Finlandiya NATO-nun yaxın tərəfdaşıdır. Ölkə Rusiya Federasiyası ilə gələcəkdə NATO-nun genişlənməsi imkanlarını bağlayan hər hansı sazişlərin imzalanmasına qarşı çıxıb.
Rusiyanın Ukraynaya təcavüzündən sonra Finlandiya vətəndaşları ölkənin NATO-ya daxil olması üçün petisiya imzalayıblar. Halbuki hələ yanvar ayında Finlandiya Alyansa qoşulmaq planlarının olmadığını açıqlamışdı.
Bu arada, Rusiya Federasiyası artıq Finlandiyanı NATO-ya mümkün girişlə hədələməyə başlayıb. Xüsusilə, Rusiya Xarici İşlər Nazirliyi İsveç və Finlandiyanı NATO-ya üzv olmağa cəhd edəcəkləri təqdirdə onları "ciddi nəticələrlə” hədələyib.
