ABŞ iqlim təşəbbüsləri üçün Afrikaya 7 milyard dollardan çox vəsait ayıracaq
ABŞ özəl şirkətləri və ABŞ səlahiyyətliləri yaşıl enerji, kənd təsərrüfatı və iqlim dəyişikliyi ilə mübarizə ilə bağlı müxtəlif təşəbbüslər vasitəsilə Afrikaya 7 milyard dollardan çox vəsait verəcək.
Bu barədə ABŞ-ın vitse-prezidenti Kamala Harrisin Zambiyaya səfəri ilə bağlı Ağ Evin mətbuat xidməti məlumat yayıb. Bildirilir ki, Kamala Harrisin Afrikada iqlimə davamlılığı inkişaf etdirmək və gücləndirmək üçün özəl sektora çağırışına cavab olaraq, özəl sektor 7 milyard dollardan çox vəsait vəd edib.
Ağ Ev qeyd edir ki, təklif olunan investisiyalar və təşəbbüslər qitənin iqtisadiyyatına faydalı təsir göstərəcək, iqlim böhranı ilə bağlı aktual ehtiyacların öhdəsindən gəlməyə kömək edəcək. ABŞ həmçinin 116 milyondan çox fermerə kömək etmək və iqlimə uyğun ağıllı əkinçilik təcrübələrini təşviq etmək istəyir.
Ümumilikdə, ABŞ administrasiyasının məlumatına görə, Harrisin çağırışına 27 şirkət və xeyriyyə təşkilatı cavab verib. Onlar fermerləri dəstəkləməyə, təmiz enerji və nəqliyyatın inkişafına, davamlılığa və iqlimə uyğun kənd təsərrüfatı təcrübələrinə sadiqdirlər.
ABŞ səlahiyyətliləri, öz növbəsində, Afrika ölkələrinə iqlim vəziyyəti haqqında məlumatlara daha çox çıxış təmin etmək, həmçinin elektrikləşdirmə və təmiz enerji təşəbbüslərini maliyyələşdirmək öhdəliyi götürür.
ABŞ-ın vitse-prezidenti Kamala Harris martın 25-dən Afrikadadır. O, artıq Qana və Tanzaniyaya səfər edib və martın 31-də Zambiyaya gedəcək. Vitse-prezident aprelin 2-də Vaşinqtona qayıdacaq. Birləşmiş Ştatlar son vaxtlar Afrika ilə əlaqələri gücləndirib: nisbətən yaxınlarda dövlət katibi Entoni Blinken, maliyyə naziri Canet Yellen, ABŞ-ın birinci xanımı Cil Bayden və BMT səfiri Linda Tomas-Qrinfild qitəyə səfər ediblər.
