Britaniya hava limanlarında böyük "tıxac" yaranıb
Böyük Britaniyaya uçan sərnişinlər, gəldikdən sonra pasportları skan edən avtomatik sərhəd nəzarət qapılarına təsir edən problem səbəbindən ciddi gecikmələrlə üzləşiblər.
Sosial mediada paylaşılan şəkillərdə Londonun Heathrow və Gatwick hava limanlarında yüzlərlə insanın uzun növbələri müşahidə olunur. Əsəbiləşən sərnişinlər bir neçə saat növbə gözləmək məcburiyyətində qaldıqlarından şikayətləniblər.
Sərhəd nəzarətinə məsul olan Böyük Britaniya Daxili İşlər Nazirliyinin sözçüsü, sərhəd sistemindəki problemdən xəbərdar olduqlarını açıqlayıb. "Biz problemi mümkün qədər tez həll etmək üçün çalışırıq və səyahət edənlər üçün narahatlığı minimuma endirmək üçün liman operatorları və hava yolları ilə əlaqə saxlayırıq" - deyə o bildirib.
Böyük Britaniyanın ən işlək hava limanı olan Hitrou növbələrlə məşğul olmaq üçün əlavə heyət yerləşdirdiyini və problemin həllinə kömək etmək üçün sərhəd nəzarəti ilə işlədiyini bildirib.
Ölkəyə gələn bir çox xarici ziyarətçi eniş zamanı sərhəd nəzarəti əməkdaşı tərəfindən qarşılanmalı olsa da, Böyük Britaniya, Aİ və ABŞ vətəndaşları da daxil olmaqla digərləri pasportlarını skan etmək və ölkəyə daxil olmaq üçün elektron qapılar kimi tanınan avtomatlaşdırılmış qapılardan istifadə edə bilərlər.
Reuters
