Polşanın müdafiə naziri ölkənin şimal-şərqində istehkamçı batalyonunun yaradıldığını açıqlayıb
Polşanın müdafiə naziri Mariuş Blaşçak ölkənin şimal-şərqində, Avqustov şəhərində Suvalki dəhlizində yerləşəcək istehkamçı batalyonunun yaradılmasını elan edib.
"Yaxınlarda Avqustovda istehkamçı batalyonu yaradılacaq. Bu, sıfırdan tikdiyimiz başqa bir hərbi hissədir və sizi əmin edirəm ki, bu, sonuncu olmayacaq", – deyə Blaşçak Twitter səhifəsində yazıb və yaxın gələcəkdə yeni sərmayələri elan edəcəyini əlavə edib.
O qeyd edib ki, Polşa əsgərlərini ölkənin təhlükəsizliyinin ən yaxşı təminatı hesab edir.
Keçən həftə hökumətin təhlükəsizlik komitəsinin sözçüsü Zbiqnev Hoffman bildirmişdi ki, Polşa müdafiə nazirliyi "Vaqner" PMC-lərinin iştirakı ilə orada manevrlər keçirmək planları ilə bağlı xəbərlərə görə ölkənin qərb hissəsindən qoşunları ölkənin şərqinə, Belarusla sərhədə yaxın ərazilərə yerləşdirmək qərarına gəlib.
