ABŞ-ın taxıl müqaviləsində ümidi Ərdoğanadır
ABŞ Dövlət Departamenti prezident Rəcəb Tayyib Ərdoğanın Rusiya prezidenti Vladimir Putinlə gözlənilən görüşünün Qara dəniz taxıl sazişinin bərpası ilə bağlı müsbət nəticələr verəcəyinə ümid etdiyini bildirib.
Dövlət Departamentinin sözçüsü Metyu Miller gündəlik mətbuat konfransında mətbuat mənsublarının suallarını cavablandırıb.
Ərdoğanın Putinlə taxıl sövdələşməsinə münasibət bildirdiyi bəyanatına toxunan Miller, gözlənilən görüşdən uğur əldə ediləcəyinə inandıqlarını bildirib.
ABŞ dövlət katibi Entoni Blinkenin Qara Dəniz Taxıl Təşəbbüsü ilə bağlı bölgədəki bütün müttəfiqlərin və tərəfdaşların dəstəyini alqışlayacağını ifadə edən Miller, Türkiyə və Rusiya liderlərinin bu mövzuda görüşü ilə bağlı ümidli olduqlarını deyib.
Mətbuat katibi qeyd edib ki, dəniz xəttindən başqa yollarla Ukraynadan taxıl daşımalarının köhnə həcmlərinə çatmaq çətin olacaq.
Miller həmçinin Rusiyanın Qara dəniz taxıl təşəbbüsündən çəkilməsindən sonra keçən həftə başlayan raket və dron hücumlarının çox sayda mülki vətəndaşın ölümünə və yaralanmasına səbəb olduğunu və rusların Dunay çayında taxıl gəmilərini də hədəf aldığını bildirib.
