Meksikada 36 immiqrant silahlı şəxslər tərəfindən qaçırılıb
Meksikanın Tamaulipas ştatında silahlı şəxslər avtobusu saxlayaraq, 36 immiqrantı zorla qaçırıblar.
Tamaulipas İctimai Təhlükəsizlik Katibliyindən verilən açıqlamada, Reynosa və Matamoros şəhərləri arasında səyahət edən immiqrantlarla dolu avtobusun naməlum silahlı şəxslər tərəfindən dayandırıldığı bildirilib.
Silah hədəsi ilə 40 immiqrantı avtobusdan çıxaran silahlı qruplaşmanın 36 immiqrantı qaçırdığı bildirilib.
Tamaulipas Baş Prokurorluğu təhlükəsizlik qüvvələrinin hadisə ilə bağlı hərəkətə keçdiyini və immiqrantların tapılması üçün genişmiqyaslı əməliyyata başladığını bildirib.
Prezident Andres Manuel Lopez Obrador Milli Sarayda gündəlik mətbuat konfransında hadisə ilə bağlı danışarkən, mühacirləri xilas etmək üçün ilk andan səylərin başladığını söyləyib.
2019-cu ilin mart ayında baş verən oxşar hadisədə San Fernando-Reynosa magistral yolunda zorla saxlanılan 20 nəfərlik immiqrant qrupundan hələ də xəbər olmadığı paylaşılıb.
Aradan 5 ilə yaxın vaxt keçməsinə və təhlükəsizlik qüvvələrinin əməliyyatlarına baxmayaraq, mühacirlərin taleyi məlum deyil.
