İsrail Ali Məhkəməsi baş nazirlə bağlı qanunun icrasını təxirə saldı
İsrail Ali Məhkəməsi hökumətin mübahisəli məhkəmə islahatları çərçivəsində keçən ilin martında qəbul edilən baş nazirin vəzifədən azad edilməsini çətinləşdirən qanunun icrasını təxirə salıb.
Bu barədə İsrail dövlət televiziyası KAN məlumat verib.
İsrail mərkəzli “Keyfiyyət İdarəetmə Hərəkatı” qeyri-hökumət təşkilatının təqdim etdiyi petisiyadan sonra alınan qərarla qanunun tətbiqi növbəti parlament seçkilərindən sonra parlament müddətinə təxirə salınıb.
Qərarda sözügedən qanunun “İsrail Parlamentinin təsisçi səlahiyyətini pozan şəxsi tənzimləmə” olduğu qeyd edilib.
Bu arada İsraildə parlament üzvlərinin seçiləcəyi parlament seçkilərinin 2026-cı ildə keçirilməsi planlaşdırılır.
İsraildə baş nazirin istefasını çətinləşdirən qanun ötən il martın 23-də qəbul edilib.
Baş nazir hökumətin dörddə üçünün təsdiq etdiyi qərara etiraz edərsə, baş nazirin vəzifədən azad edilməsi parlamentdə səsə qoyulur.
Parlament sədrinin təyin edəcəyi iclasda 90 deputat bu istiqamətdə səs verərsə, baş nazir vəzifəsindən azad edilə bilər.
Sözügedən qanun Ali Məhkəmə də daxil olmaqla, məhkəmə sisteminin baş naziri vəzifədən azad etmə səlahiyyəti ilə bağlı qəbul etdiyi hər hansı qərarın etibarsız sayılmasını ehtiva edir.
