Tramp qarşılıqlı tarifləri açıqlayıb
ABŞ prezidenti Donald Tramp sabahdan etibarən ABŞ-ın digər ölkələrə qarşılıqlı tariflər tətbiq edəcəyini və əsas tarif dərəcəsinin 10 faiz olacağını açıqlayıb.
Tramp Ağ Evdə keçirilən tədbirdə digər ölkələrə qarşılıqlı tariflərin tətbiqini nəzərdə tutan fərmanı imzalayıb.
ABŞ prezidenti buradakı çıxışında bu günü çoxdan gözlənilən qurtuluş günü olaraq səciyyələndirərək, “Ölkəmiz və vergi ödəyicilərimiz 50 ildən artıqdır istismar olunur, lakin bundan sonra buna icazə verilməyəcək” deyib.
Bu günün ABŞ tarixində ən mühüm günlərdən biri olduğunu vurğulayan Tramp, “Bu, bizim iqtisadi müstəqillik bəyannaməmizdir” söyləyib.
Tramp xarici ticarət maneələrini aradan qaldıracaqlarını və nəticədə bunun ölkə daxilində daha çox istehsal, daha güclü rəqabət və istehlakçılar üçün qiymətlərin aşağı salınması demək olacağını bildirib.
Xroniki ticarət kəsirlərini iqtisadi problemdən çox ABŞ-ın təhlükəsizliyini təhdid edən milli fövqəladə hal kimi xarakterizə edən Tramp bunun ölkə üçün böyük təhlükə olduğunu vurğulayıb.
ABŞ-ın sabahdan etibarən digər ölkələrə qarşılıqlı tariflər tətbiq edəcəyini bildirən Tramp, "Minimum əsas tarif dərəcəsini 10 faiz olaraq təyin edəcəyik" deyib.
Bundan əlavə, Tramp xatırladıb ki, idxal olunan avtomobillər üçün 25 faizlik gömrük rüsumu bu gecə yarısından etibarən qüvvəyə minəcək.
ABŞ prezidenti Trampın imzaladığı fərman çərçivəsində ABŞ-ın bir çox ticarət tərəfdaşlarına tariflərin tətbiqi nəzərdə tutulur. Tarif dərəcələri 10 faizdən 50 faizə qədər dəyişir.
Ağ Evdən verilən açıqlamada, ABŞ prezidenti Trampın 1977-ci il Beynəlxalq Fövqəladə İqtisadi Güclər Aktı (IEEPA) çərçivəsində səlahiyyətlərindən istifadə edərək, ölkənin ticarət əlaqələrində qarşılıqlılığın olmaması, valyuta manipulyasiyası və digər ölkələr tərəfindən qorunan yüksək əlavə dəyər vergiləri kimi siyasətlərin səbəb olduğu ticarət kəsirinə qarşı tədbirlər gördüyü bildirilib.
Bu kontekstdə bütün ölkələrə tətbiq edilən 10 faizlik baza gömrük rüsumunun aprelin 5-dən, ölkələr üçün xüsusi olaraq müəyyən edilən daha yüksək tariflərin isə aprelin 9-da qüvvəyə minəcəyi bildirilib.
Bu tariflərin ticarət kəsirindən yaranan təhlükənin aradan qaldırıldığı və ya yüngülləşdirildiyi müəyyən edilənə qədər qüvvədə qalacağı vurğulanıb.
Açıqlamada fentanil və immiqrasiya böhranı səbəbiylə Kanada və Meksikaya tətbiq edilən tariflərin müvafiq qərarlara uyğun olaraq qüvvədə qalacağı, ABŞ-Meksika-Kanada Razılaşmasına uyğun malların isə istisnalar çərçivəsində qalmağa davam edəcəyi bildirilib.
Sektor tarifləri açıqlanan polad, alüminium, avtomobil, mis, yarımkeçiricilər və taxta-şalban kimi məhsulların, həmçinin ABŞ-da mövcud olmayan enerji və bəzi mineralların qarşılıqlı tarif tənzimləmələrindən azad ediləcəyi bildirilib.
Açıqlamada ABŞ-ın mal ticarəti kəsirinin keçən il 1,2 trilyon dolları keçdiyi diqqətə çatdırılıb və 2001-ci ildə 28,4 faiz olan ABŞ-ın qlobal istehsaldakı payının 2023-cü ildə 17,4 faizə endiyi paylaşılıb.
