ABŞ-dan psixoloji əməliyyat təlimatı: Qlobal təbliğatla mübarizədə yeni dövr
ABŞ İran müharibəsi və artan qlobal anti-Amerika meyillərinə qarşı səfirliklərinə psixoloji əməliyyat yönümlü ünsiyyət strategiyası təlimatı göndərib.
AFN.az xəbər verir ki, ABŞ rəhbərliyi dünya miqyasındakı diplomatik nümayəndəliklərinə ordunun Psixoloji Əməliyyatlar (PSYOP) bölməsi ilə koordinasiyalı fəaliyyət göstərmək tapşırığı verib.
Marko Rubionun imzası ilə çatdırılan və "The Guardian" tərəfindən ictimailəşdirilən sənəddə xarici təbliğata qarşı birgə mübarizə başladılması tələb olunub. Təlimatda beş əsas hədəf müəyyən edilib: düşmən mesajlara qarşı çıxmaq, informasiyaya çıxışı genişləndirmək, rəqib aktorları ifşa etmək, ABŞ tərəfdarı olan yerli səsləri gücləndirmək və Amerikanın hekayəsini daha effektiv çatdırmaq.
Diplomatlara yerli influenserlər, akademiklər və cəmiyyət liderləri ilə təmas quraraq ABŞ mesajlarının "orqanik rəy" kimi qəbul edilməsinə nail olmaq tövsiyə olunur. Sənəddə xüsusilə İlon Maskın sahibi olduğu "X" platformasından və onun "İcma Qeydləri" funksiyasından dezinformasiya ilə mübarizədə yararlanmaq vurğulanıb. Eyni zamanda, Avropa Birliyi rəqəmsal qaydaları pozduğu üçün "X" platformasını 120 milyon avro məbləğində cərimələyib.
Donald Tramp administrasiyasının Qlobal Qarşılıqlı Əlaqə Mərkəzini (GEC) bağlamaq qərarından sonra gələn bu yeni təlimat, Vaşinqtonun qlobal informasiya müharibəsində daha mərkəzləşdirilmiş strategiyaya keçid etdiyini göstərir. Bu addım İranla müharibənin və Çin-Rusiya ilə rəqabətin kəskinləşdiyi dövrə təsadüf edir.
