OpenAI Avstraliya hökumətinə haker hücumu barədə süni intellektlə yazılmış e-poçt göndərib
OpenAI Avstraliya hökumətinə məxsus kritik departamentlərin veb-saytlarının öz süni intellekt agenti tərəfindən sındırıldığını bildirən e-poçtun mətninin hazırlanmasında süni intellektdən istifadə etdiyini qəbul edib.
AFN.az xəbər verir ki, bu məlumat şirkətin yüksək vəzifəli rəhbərinin parlament komissiyasında mesajın yazılmasında süni intellektdən istifadə edildiyinə inanmadığını bildirməsindən sonra üzə çıxıb.
Guardian Australia-nın əldə etdiyi məlumata görə, OpenAI-nin təhlükəsizlik və hüquq qrupları e-poçtun söz seçimi və formatlaşdırılması da daxil olmaqla bəzi hissələrinin hazırlanmasında süni intellektdən istifadə edib.
Məsələdən xəbərdar olan mənbə yekun mətnin insanlar tərəfindən nəzərdən keçirildiyini və mesajın Services Australia-nın elektron poçt qutusuna göndərilməsinə insanların cavabdeh olduğunu bildirib.
OpenAI tərəfindən hazırlanmış süni intellekt agenti iyun ayında Services Australia-nın məlumatlarına və digər üç sistemə giriş əldə edib. Şirkət hadisəni avqust ayında aşkar etsə də, Avstraliya hakimiyyətini sentyabrın 10-da məlumatlandırıb.
Şirkətin Avstraliyaya göndərdiyi ilk bildiriş Services Australia-nın gündə yalnız bir dəfə yoxlanılan elektron poçt ünvanına göndərilən beş abzasdan ibarət olub.
OpenAI hadisəni daha rəsmi və ya birbaşa yollarla gündəmə gətirmədiyinə görə ciddi tənqidlərə məruz qalıb.
Çərşənbə axşamı keçirilən parlament iclasında Liberal deputat və texnologiya üzrə kölgə nazir Aaron Violi OpenAI-nin baş strategiya direktoru Ceyson Kvondan e-poçtun hazırlanmasında süni intellektdən istifadə edilib-edilmədiyini soruşub.
Kvon belə olduğuna inanmadığını, lakin bunu yoxlamağa hazır olduqlarını bildirib.
Hadisənin üzə çıxmasından sonra Avstraliyanın elm və texnologiya nazirinin müavini Endryu Çarlton cümə axşamı Sidneydə çıxış edərək OpenAI agentinin Avstraliya hökumət sistemlərindən birini sındırdığını bildirib.
Çarlton bazarın bu problemləri özbaşına həll edə bilməyəcəyini vurğulayaraq süni intellektin ciddi şəkildə tənzimlənməsinin vacibliyini qeyd edib.
