Belçikada qeyri-qanuni miqrantların deportasiyasını asanlaşdıran qanun layihəsi qəbul edilib
Belçika parlamentinin Daxili İşlər Komissiyası ictimai asayiş və ya milli təhlükəsizlik baxımından təhdid yaratdığı qiymətləndirilən qeyri-qanuni miqrantların ölkədən çıxarılmasını asanlaşdırmaq məqsədilə onların evlərinə daxil olmağa imkan verən qanun layihəsini qəbul edib.
AFN.az xəbər verir ki, rəsmi Belga xəbər agentliyinin məlumatına görə, Sığınacaq və Miqrasiya naziri Anneleen Van Bossuyt ilə Ədliyyə naziri Annelies Verlinden tərəfindən hazırlanan layihə ölkədə qanuni qalmaq hüququ olmayan və geri qaytarılma prosedurunda əməkdaşlıq etməkdən israrla imtina edən şəxslərlə bağlı tənzimləmələri nəzərdə tutur.
Layihəyə əsasən, həmin şəxslər arasında ictimai asayiş və ya milli təhlükəsizlik üçün təhdid yaratdığı qiymətləndirilən şəxslərin evlərinə məhkəmə icazəsi ilə daxil olmaq mümkün olacaq. Polis və Miqrasiya İdarəsinin əməkdaşlarının iştirak edəcəyi əməliyyatlar zamanı həmin şəxsin deportasiya prosesi çərçivəsində inzibati nəzarətə götürülməsi nəzərdə tutulur.
Komissiyadakı müzakirələr zamanı müxalifət nümayəndələri, federal polis, istintaq hakimləri və vəkillər tənzimləməyə etiraz ediblər. Tənqidlərdə ictimai asayiş və ya milli təhlükəsizliyə təhdid ifadəsinin kifayət qədər aydın müəyyən edilmədiyi və uşaqların hüquqlarını qoruyacaq təminatların yetərsiz olduğu bildirilib.
Van Bossuyt layihənin komissiyada qəbul edilməsini mühüm irəliləyiş kimi qiymətləndirərək, tənzimləmənin beynəlxalq müdafiə altında olan şəxsləri və ya yalnız ölkədə qeyri-qanuni vəziyyətdə olan şəxsləri ümumi şəkildə hədəf almadığını bildirib. Nazir evlərdə həyata keçiriləcək əməliyyatların müəyyən şərtlərə və məhkəmə icazəsinə bağlı olacağını vurğulayıb.
Van Bossuyt Leuven kimi tənzimləməni tətbiq etməyəcəyini açıqlayan yerli idarəetmə orqanlarına da etiraz edərək, bu mövqenin şəhər sakinlərinin təhlükəsizliyini riskə atacağını müdafiə edib.
Komissiyada qəbul edilən qanun layihəsinin qüvvəyə minməsi üçün parlamentdəki prosedurun tamamlanması tələb olunur.
Belçikada 2021-ci ildən bəri sığınacaq axtaranların qəbulu və yerləşdirilməsi sistemindəki imkanların yetərsizliyi səbəbindən böhran yaşanır. Xüsusilə təkbaşına gələn kişi sığınacaq axtaranların bir hissəsi yerləşdirmə mərkəzlərində yer tapa bilmədiyi üçün paytaxt Brüsseldə küçələrdə və ya müvəqqəti sığınacaqlarda yaşamağa davam edir.
