İlon Mask Amazon-a rəqib onlayn alış-veriş platformu yaratmaq ideyasını irəli sürüb
ABŞ-li iş adamı, Tesla və SpaceX şirkətlərinin baş icraçı direktoru (CEO) İlon Mask Grok süni intellekt köməkçilərinin sifariş verməsinin qarşısının alınması səbəbindən pərakəndə satış nəhəngi Amazon-a rəqib ola biləcək yeni bir biznes yaratmaq ideyasını gündəmə gətirib.
AFN.az xəbər verir ki, Mask bu təklifi X sosial şəbəkəsində istifadəçinin paylaşımına cavab olaraq irəli sürüb.
X istifadəçisi paylaşımında Amazon-un Grok botlarının sifariş verməsinə mane olduğunu, Maskın isə botun alış-verişi başqa platformadan həyata keçirməsini təmin etməyə çalışdığını yazıb. İstifadəçi Amazon-dan etdiyi qaytarmaları idarə edən Grok botlarından birinin olduğunu və buna görə vəziyyəti yaxından izlədiyini bildirib. O, həmçinin bot üçün mağazanı dəyişməyin mümkünlüyünü soruşaraq X Shop adlı mağaza açmağın vaxtının çatdığını qeyd edib.
Həmin paylaşımı sitat gətirən Mask Amazon-a rəqib bir biznes yaratmağın mümkünlüyünü ifadə edib.
Amazon vasitəsilə Grok botuna məhsul sifariş etdirməyə çalışan istifadəçilər süni intellekt agentinin icazəsiz şəkildə girişini davam etdirməsinin müştərilərin qəbul etdiyi Amazon İstifadə Şərtlərini pozduğu barədə xəbərdarlıqla qarşılaşırlar.
Öz süni intellekt dəstəkli alış-veriş agentlərini inkişaf etdirən Amazon-un onlayn alışları avtomatlaşdırmağı hədəfləyən digər süni intellekt alətlərini də platformasında blokladığı bildirilir.
Ekspertlər Maskın şirkətləri tərəfindən dəstəklənəcək yeni alış-veriş platformasının Amazon-a rəqib ola biləcəyini bildirirlər. Bununla belə, onların fikrincə, real və işlək alternativ yaratmaq üçün sadəcə süni intellekt interfeysi kifayət etmir.
