Dictionary.com 2026-cı ilin sözü kimi “maxxing”i seçib
Rəqəmsal ingilis dili lüğətlərindən biri olan Dictionary.com saytı 2026-cı il üçün seçdiyi ilin sözünün onlayn forumlarda yaranan "maxxing" ifadəsi olduğunu açıqlayıb.
AFN.az xəbər verir ki, seçim dil və mədəniyyətdə il ərzində müşahidə olunan tendensiyalar əsasında aparılıb.
Saytın açıqlamasına görə, redaktorlar hər il dil və mədəniyyətdəki trendlər nəzərə alınmaqla müəyyənləşdirilən Dictionary.com-un ilin sözü adına namizəd göstərilən ifadələri qiymətləndiriblər.
Namizədlər arasında "maxxing" sözü il ərzində müşahidə olunan ictimai dəyişiklikləri xüsusilə əks etdirdiyi üçün 2026-cı ilin sözü seçilib.
Əvvəlcə onlayn forumlarda, daha sonra isə sosial mediada işlədilməyə başlayan bu söz bir işi son həddinə qədər çatdırmaq və ya insanların həyatlarının müəyyən bir sahəsini mümkün qədər yaxşılaşdırması anlayışını ifadə edir.
Mənşəyi maksimum və ya maksimuma çatdırmaq kimi ifadələrə söykənən "maxxing" sözü həm müstəqil, həm də başqa sözlərlə birləşərək işlədilir.
Bu sözdən yaranan ifadələr arasında insanın fiziki cəlbediciliyini mümkün olan ən yüksək səviyyəyə çatdırmağa çalışmasını bildirən "looksmaxxing" və müəyyən bir işdə süni intellektdən mümkün qədər çox faydalanmağa işarə edən "tokenmaxxing" də var.
Bu il "maxxing" sözünün rəqibləri arasında "affordability" (əlverişli qiymətlilik) və "data center" (məlumat mərkəzi) ifadələri də yer alıb.
