Avropa İttifaqının Azərbaycandakı nümayəndəliyinin rəhbəri Gömrük Akademiyasında olub
Avropa İttifaqının Azərbaycandakı nümayəndəliyinin rəhbəri Kestutis Yankauskas Dövlət Gömrük Komitəsinin Akademiyasında “Avropa İttifaqı və Azərbaycan: gələcək üçün tərəfdaşlıq” mövzusunda mühazirə ilə çıxış edib.
Akademiyadan AFN-ə verilən məlumata görə, tədbir çərçivəsində Akademiyanın rəisi Qulu Novruzov və Avropa İttifaqının Azərbaycan nümayəndəliyinin rəhbəri Kestutis Yankauskas arasında görüş keçirilib.
Qonağı salamlayan Qulu Novruzov Akademiyanın fəaliyyəti, tədris prosesi, ixtisaslar haqqında geniş məlumat verib. Akademiya rəisi beynəlxalq əməkdaşlığa böyük önəm verildiyini bildirərək, 2020-ci ilin Akademiyada “Beynəlxalq əməkdaşlıq ili” elan olunduğunu qeyd edib.
Görüşdə gələcək əməkdaşlıqla bağlı müzakirələr, həmçinin qarşılıqlı maraq doğuran bir sıra məsələlər ətrafında fikir mübadiləsi aparılıb.
Sonra qonaq Akademiyada yaradılan infrastrukturla tanış olub.
Kestutis Yankauskas “Avropa İttifaqı və Azərbaycan: gələcək üçün tərəfdaşlıq” mövzusunda mühazirə ilə çıxış edib, Avropa İttifaqının tarixi başlanğıcından, onun əsaslarından, Avropa İttifaqı və Azərbaycan münasibətlərindən danışıb.
Sonda o, müəllim və tələbələrin suallarını cavablandırıb.
