Kanadadakı meşə yanğınlarından 100 milyondan çox amerikalı zərər çəkəcək
Kanadada uzun müddət davam edən meşə yanğınlarının tüstüsü Orta Qərb və Şərq üzərində səmanı doldurduğundan, amerikalıların təxminən üçdə biri cümə axşamı pis hava keyfiyyətindən əziyyət çəkəcək.
AFN.az "Reuters"ə istinadən xəbər verir ki, Milli Meteoroloji Xidməti durumla bağlı açıqlama yayıb. Xidmətin məlumatına görə, pis hava keyfiyyəti xəbərdarlığı ABŞ-da gecə yarısına qədər qüvvədədir. Əhatə dairəsi Viskonsin və İllinoys ştatının şimalından Miçiqan, həmçinin Nyu York və Şərq Sahilinə qədər uzanır.
100 milyondan çox amerikalı uzun müddət açıq havada qalmağı məhdudlaşdırmağa və ağciyər və ya tənəffüs xəstəliklərindən əziyyət çəkirlərsə, zəruri hallarda maska taxmağa çağırılıb. Uşaqlara və yaşlılara çölə çıxmağı minimuma endirmək və ya gərgin fəaliyyətlərdən çəkinmək tövsiyə olunur.
Nyu-York, Çikaqo və Filadelfiya kimi Amerikanın böyük şəhərlərinin sakinləri bütün günü buludlu səmanı görə bilər və yanan odun iyini hiss edə bilərlər.
Havanın keyfiyyəti ilə bağlı xəbərdarlıqlara, tarixində meşə yanğınları mövsümünün ən pis başlanğıcı ilə mübarizə aparan Kanadada alovlanan meşə yanğınlarından tüstünün yayılması səbəb olub.
Artıq 8 milyon hektar ərazi yanıb. Çərşənbə günü 477 aktiv yanğın olub, onların təxminən yarısı nəzarətdən kənar hesab edilib və Sakit okeandan Atlantik sahillərinə qədər yayılıb.
