Hollandiyada 2015-ci ildən bəri polis zorakılığı nəticəsində 100-ə yaxın insan həyatını itirib
2015-ci ildə Hollandiyanın Haaqa şəhərində polis tərəfindən saxlanıldıqdan qısa müddət sonra dünyasını dəyişən Mitch Henriquez hadisəsindən bəri ölkədə polis zorakılığı yüksələn xətt üzrə davam edir.
AFN.az xəbər verir ki, bu barədə İngiltərənin Durham Universitetinin Siyasət və Beynəlxalq Münasibətlər Departamentinin doktoru Marijn Nieuvenhuis bildirib. O, AA müxbirinə Hollandiyada son illərdə artan irqçi polis zorakılığı və bunun səbəbləri ilə bağlı danışıb.
Polis zorakılığının ən çox etirazlarda özünü göstərdiyini ifadə edən Nieuvenhuis polisin nümayişlərə müdaxiləsinin nümayişçi qruplara görə fərqli olduğuna diqqət çəkib.
Hollandiyada polis zorakılığı və etnik profilləşdirmə ilə bağlı monitorinq işləri aparan "Controle Alt Delete" hüquq müdafiə təşkilatının 2022-ci il hesabatına toxunan Nieuvenhuis bildirib ki, hesabatda Hollandiya polisinin sosial hadisələrə daha çox müdaxilə etdiyinə dair sübutlar var.
Hesabata görə, Hollandiya polisinin 2022-ci ildə 33 min 584 dəfə zorakılıq tətbiq etdiyinə və bu rəqəmin 2019-cu ildən bəri davamlı olaraq artdığına diqqət çəkən Nieuvenhuis bildirib: "Controle Alt Delete" 2015-ci ildə Mitch Henriquezin faciəvi ölümündən sonra polis zorakılığı nəticəsində təxminən 100 ölüm hadisəsini sənədləşdirib. Qurbanların təxminən üçdə biri immiqrant mənşəlidir. "Amnesty İnternational" həmçinin polis məmurlarının güc tətbiqi ilə bağlı Hollandiya polisinin qaydalarını tənqid edib. Polis itləri, dəyənəklər, boğulma məftilləri və silahlar kimi elementlərdən istifadə edilib.
Hüquq-mühafizə orqanlarının məsuliyyəti altında öldürülən adamlarla bağlı polislərin mühakimə olunmadığını deyən Nieuvenhuis qeyd edib ki, digər Qərb ölkələrindən fərqli olaraq, əksər hallarda hadisəyə qarışan polislər mühakimə olunmur.
Nieuvenhuis Hollandiyada irqçi polis zorakılığının səbəblərinə də toxunub: "Polis zorakılığı və polisin etnik profilləşdirmə kimi ayrı-seçkilik tətbiqləri ilə bağlı tez-tez vurğulanan iki məsələ var. Biri irqçilik haqqında məlumatsızlıq, digəri isə keçmiş səhvlərdən nəticə çıxarmaq üçün institusional uğursuzluq".
Hollandiyada polisin "imtiyazlı" vəziyyətdə olduğunu bildirən Nieuvenhuis bildirib ki, polis institutu Hollandiyadakı struktur bərabərsizliklərin əksidir: "Polisi əmək bazarı və təhsil sektoru da daxil olmaqla digər qurumlardan fərqləndirən onun oynadığı xüsusi sosial roludur. Onlar polisin icraedici qolu kimi görünürlər. İndiki formada polis Hollandiya demokratiyasına xeyirdən çox zərər verir".
O, Hollandiya polisinə qarşı irqçilik və ayrı-seçkiliklə bağlı şikayətlərin əhəmiyyətli dərəcədə artdığını vurğulayıb: "Bu şikayətlərlə bağlı çox nadir nəticələr var. RTL Hollandiya televiziyasının 2020-ci il hesabatına görə, bildirilən 70 ayrı-seçkilik hadisəsindən yalnız 2-nin baş verdiyi hesab edilib".
