Vyetnamın paytaxtında yaşayış binası yandı: 8 nəfər ölüb
Vyetnamın paytaxtı Hanoyda yaşayış binasında baş verən yanğında 8 nəfər həyatını itirib.
Dövlətə məxsus “Vietnam News” saytında yer alan xəbərə görə, dünən yerli vaxtla saat 23.50-də Hanoyda doqquz mərtəbəli yaşayış binasının birinci mərtəbəsində yanğın baş verib.
Mənzildən 70 nəfər təxliyə edilib, onlardan 54-ü xəstəxanaya yerləşdirilib. Xəstəxanadan verilən məlumata görə, sağlamlıq ocaqlarına köçürülənlərdən 8 nəfəri dünyasını dəyişib.
Rəsmilər hələlik ölənlərin son sayını açıqlamasa da, yerli mənbələr yanğında onlarla insanın həyatını itirdiyini bildiriblər.
Təxminən 150 nəfərin yaşadığı yaşayış binasında axtarış-xilasetmə işlərinin davam etdiyi bildirilsə də, ölənlərin sayının artacağı ilə bağlı narahatlıqlar var.
