Zelenski Rumıniyaya ilk rəsmi səfərə getdi
Ukrayna prezidenti Volodimir Zelenski oktyabrın 10-da genişmiqyaslı müharibə başlayandan bəri Rumıniyaya ilk rəsmi səfərini edib.
AFN.az xəbər verir ki, o, bu barədə "Telegram"da məlumat verib.
Zelenski, o cümlədən Rumıniya prezidenti Klaus İohannislə görüşəcək və onunla danışıqlar aparacaq. Mövzulara hava və digər müdafiə koalisiyalarının inkişafı, hava hücumundan müdafiənin gücləndirilməsi, Qara dəniz regionunda təhlükəsizlik və müttəfiqlərlə əlaqələr daxildir.
"İlk növbədə, Ukrayna müdafiəmizi əhəmiyyətli dərəcədə gücləndirən səmimi və genişmiqyaslı yardıma görə Rumıniyaya minnətdardır. Həm də ölkələrimizə birlikdə dünya təhlükəsizliyinin, xüsusilə də ərzaq təhlükəsizliyinin mühüm donorları olmasına imkan verən ən konstruktiv həmrəyliyə görə... Bu səfər xalqlarımıza fayda verəcək”, - deyə məlumatda bildirilir.
Zelenski Rumıniyaya Rusiya PUA-larının NATO ölkəsi ilə sərhəd yaxınlığında hücumları fonunda gəlib.
Rumıniya ərazisində artıq bir neçə dəfə Rusiya dronlarının qalıqları aşkar edilib. Sentyabrın 30-da Buxarest bildirib ki, Rusiya pilotsuz uçuş aparatları ölkənin hava məkanını pozmuş ola bilər.
"Reuters" xəbər verir ki, NATO hücumların qəsdən törədildiyinə inanmır. Rumıniya hava hücumundan müdafiə sistemlərini Ukrayna ilə sərhədə yaxınlaşdırır. Sərhəd yaşayış məntəqələrinin sakinləri artıq təhlükə ilə bağlı xəbərdarlıqlar almağa başlayıblar.
