Qəzza zolağında 330 mindən çox insan evlərini tərk etmək məcburiyyətində qalıb - OCHA
BMT-nin Humanitar Məsələlər üzrə Koordinasiya Ofisi (OCHA) bildirib ki, İsrail anklavı bombalamağa başlayandan bəri Qəzza zolağında 330 mindən çox insan evlərini tərk etmək məcburiyyətində qalıb.
Açıqlamada OCHA Qəzza zolağında mülki infrastruktura dəyən ziyanla bağlı narahatlığını ifadə edib: "İsrail əhalinin sıx məskunlaşdığı anklavı blokadaya almağa başladı, elektrik enerjisini, yanacaq və suyu kəsdi".
“Köçkünlərin ümumi sayı son 24 saat ərzində 30 faiz artıb və hazırda 338 934 nəfərə çatıb ki, onların üçdə ikisindən çoxuna UNRWA məktəblərində sığınacaq verilib”, - deyə məlumatda qeyd edilib.
Qəzza zolağındakı Fələstin Səhiyyə Nazirliyi daha əvvəl bildirmişdi ki, 600 min insan sudan məhrumdur və bəzi xəstəxanalar quyulardan gələn sudan istifadə edirlər. Nazirlik əlavə edib ki, Qəzza zolağında ölənlərin sayı şənbə günündən bəri 1200-ə yaxınlaşıb.
Bu arada, Ümumdünya Ərzaq Proqramı "800,000-dən çox insana kritik bir qida həyat xətti" təmin etmək öhdəliyi götürdüyünü açıqlayıb.
