Pakistan hərbi bazaya hücumda və 23 əsgərin öldürülməsində Talibanı məsul görür
Pakistan hərbi bazaya hücumda 23 əsgərin öldürülməsinə görə Əfqanıstan Taliban hökumətinə etiraz edərək, cinayətkarlara qarşı tədbir görülməsini tələb edib.
Qruplaşmanın üzərinə götürdüyü silahlı və bombalı hücum, 241 milyon insanın yaşadığı ölkədə bu cür hücumların artması fonunda fevralın 8-nə təyin edilmiş ümumi seçki ilə bağlı siyasi analitiklər tərəfindən qaldırılan narahatlıqlar ərəfəsində baş verib.
Pakistanın Xarici İşlər Nazirliyi hücumla bağlı Kabil səfirini çağırıb. Nazirliyin bəyanatında bildirilir ki, Taliban administrasiyasından tam şəkildə araşdırma aparmaq və son hücumun səbəbkarlarına qarşı sərt tədbirlər görmək xahiş edilib.
Talibanın sözçüsü Zabihullah Mücahidin "Reuters"ə verdiyi məlumata görə, hadisənin Əfqanıstanla heç bir əlaqəsi yoxdur. "Əgər onlar araşdırma istəsələr və təfərrüatları bizimlə bölüşsələr, biz araşdıracağıq" - deyə o qeyd edib.
İslamabad və Kabil arasında münasibətlər son dövrlər ən aşağı səviyyəyə düşüb. Oktyabr ayında Pakistan bu il baş verən 24 kamikadze partlayışından 14-də onları günahlandıraraq, qanuni sənədləri olmayan bütün Əfqan vətəndaşlarının ölkədən çıxarılmasına göstəriş verib.
Pakistan hökuməti bildirir ki, islamçı yaraqlılar bu həftəki kimi hücumlar hazırlamaq və həyata keçirmək üçün Əfqanıstanda təhlükəsiz sığınacaqlardan istifadə edirlər. Kabil isə öz növbəsində ittihamları rədd edir və Pakistanın təhlükəsizliyinin daxili məsələ olduğunu deyir.
