FİFA ilin oyunçusu mükafatına namizədləri açıqlayıb
"İnter Mayami"nin və Argentina millisinin hücumçusu Lionel Messi Beynəlxalq Futbol Federasiyasının (FIFA) versiyasına görə ilin futbolçusu mükafatına iddialılar siyahısına daxil edilib.
Bu barədə təşkilatın saytında məlumat verilir.
Siyahıda Messidən başqa daha 10 futbolçu var. Onların arasında “Real Madrid”in fransalı hücumçusu Kilian Mbappe, “Mançester Siti”nin norveçli hücumçusu Erlinq Holland və İspaniya millisinin yarımmüdafiəçisi Rodri də var.
İlin ən yaxşı məşqçisi adına namizədlər də bəlli olub. Siyahıda beş mütəxəssis yer alıb: Karlo Ançelotti (Real Madrid), Pep Qvardiola (Mançester Siti), Xabi Alonso (Leverkuzen), Lionel Skaloni (Argentina millisi) və Luis de la Fuente (İspaniya millisi). Qaliblər azarkeşlər, eləcə də bütün milli komandaların kapitanları, məşqçiləri və media nümayəndələrinin səsverməsi ilə seçiləcək.
Qeyd edək ki, FİFA tərəfindən ilin ən yaxşı oyunçusu mükafatının hazırkı qalibi Messidir. Qvardiola 2023-cü ilin ən yaxşı məşqçisi seçilib.
