"OpenAI" "Chrome"u "Google"dan almağa hazırdır: Süni intellektdə nəyi dəyişə bilər?
Süni intellekt araşdırmaları ilə diqqət çəkən "OpenAI" ABŞ Ədliyyə Nazirliyinin (DOJ) "Google"a qarşı açdığı antiinhisar davasında gündəmə gələn "Chrome brauzerinin satışı" təklifi ilə bağlı açıqlama verib. "OpenAI" satışa çıxarılacağı təqdirdə "Chrome"u satın almağı düşünə biləcəyini söyləyib.
"Google"a qarşı açılan məhkəmə iddiası şirkətin internet axtarışı və reklam bazarında inhisarçı mövqeyinə son qoymaq məqsədi daşıyır.
Bu kontekstdə gündəmə gələn həll yollarından biri də şirkətin bəzi məhsullarını satmasıdır. Ən gözə çarpan variantlardan biri "Google"un internet brauzeri "Chrome"un başqa şirkətə ötürülməsidir.
Bu ehtimalı qiymətləndirmək üçün keçirilən dinləmələrə bir çox texnologiya şirkəti dəvət olunub və "OpenAI" də onların arasında olub.
"Bloomberg"in məlumatına görə, "OpenAI"nin ChatGPT bölməsinin rəhbəri Nik Turli dinləmələr zamanı şirkətin "Chrome"u almağa açıq olduğunu bildirib. Turli "OpenAI"nin "Chrome" ilə maraqlanan yeganə şirkət olmadığını, digər şirkətlərin də brauzeri almaqda maraqlı olduğunu, lakin o, həmin şirkətlərin adlarını açıqlaya bilməyəcəyini bildirib.
Turli vurğulayıb ki, "Chrome"un mümkün alınması halında "OpenAI" brauzeri ilk süni intellekt strukturuna çevirməyi hədəfləyir. Hazırda istifadəçilər "Chrome" vasitəsilə ChatGPT genişlənməsindən istifadə edə bilərlər. Bununla belə, "Chrome" "OpenAI"yə keçərsə, onun daha əhatəli və inteqrasiya olunmuş süni intellekt həlləri təklif edəcəyi gözlənilir.
