Livanın baş naziri İsraili hücumları dayandırmağa çağırıb
Livan öz suverenliyini bərpa etmək və İsraillə sərhəddə təhlükəsizliyi gücləndirmək üçün zəruri olan BMT Təhlükəsizlik Şurasının 1701 saylı qətnaməsini həyata keçirmək üçün çalışır.
AFN.az xəbər verir ki, bunu Bağdadda Ərəb Liqasının 34-cü Sammitinin açılışında çıxış edən respublikanın baş naziri Nəvaf Salam deyib. Onun açıqlaması “Əl-İxbariyyə” telekanalı tərəfindən yayımlanıb.
“Ölkəmiz İsrailin işğalından və hər gün atəşkəs rejiminin pozulmasından əziyyət çəkməkdə davam edir. Buna görə də biz ərəb qardaşları İsraili hücumlarını dayandırmağa və qoşunlarını Livan ərazisindən tamamilə çıxarmağa məcbur etmək üçün beynəlxalq ictimaiyyətə təzyiq göstərməyə çağırırıq” - deyə baş nazir qeyd edib.
O, Livanın yeni hökumətinin qonşu dövlətlərin işlərinə qarışmamaq öhdəliyini vurğulayıb: "Livan ərəb ölkələri ilə strateji tərəfdaşlıq qurmaq niyyətindədir. Biz tariximizdə yeni səhifə açmışıq və islahatlar siyasəti aparırıq”.
Baş nazir ABŞ prezidenti Donald Trampın Suriyaya qarşı sanksiyaları ləğv etmək qərarını alqışlayıb və bu addımın Livan və bütün region üçün müsbət nəticələri olacağını qeyd edib: "Biz köçkün suriyalıların vətənlərinə qaytarılması prosesinin qurulmasında Dəməşqlə əməkdaşlığa hazırıq və bu məsələdə dost ölkələrin köməyinə ümid edirik".
