Yerin "buzlaq əkizi" kəşf edildi
Astronomlar Yerə bir əkiz qədər bənzəyən, lakin dondurucu soyuqlara sahib yeni bir planet namizədi kəşf ediblər. HD-137010 b adlandırılan bu dünya gələcəkdə həyat ehtimalı daşıyan yerlər sırasına daxil edilib.
Tədqiqatçılar təxminən 150 işıq ili məsafədə, struktur baxımından Yer kürəsinə çox bənzəyən, lakin olduqca soyuq olan bir "ekzoplanet" tapdıqlarını elan ediblər. NASA-nın fəaliyyətini başa vurmuş "Kepler" kosmik teleskopunun məlumatları əsasında kəşf edilən bu yeni dünya elm aləmində böyük marağa səbəb olub.
HD-137010 b adı verilən planet Yerdən təxminən 1,2 dəfə ağırdır. Onun ən diqqətçəkən xüsusiyyəti isə orbit dövrüdür: bu planet öz ulduzu ətrafında tam dövrəsini 355 günə tamamlayır. Yəni bu uzaq dünyada bir il, demək olar ki, bizimki ilə eyni uzunluqdadır.
Tədqiqatçılar planetin öz ulduzunun "yaşayış zonasında" yerləşmə ehtimalını %51 olaraq hesablayırlar. Lakin ulduzundan aldığı enerji Yerin aldığı enerjinin üçdə birindən az olduğu üçün səth temperaturunun -68 ilə -85 dərəce arasında olduğu təxmin edilir. Bu göstərici planeti hətta Marsdan daha soyuq edir.
"Qar topu" ssenarisi və həyat ehtimalı
Alimlərin fikrincə, planet tamamilə buzlaqlarla örtülmüş "qar topu" mərhələsində ola bilər. Lakin əgər onun atmosferində bol miqdarda karbon qazı (CO2) varsa, yaranacaq istixana effekti səth temperaturunu artıraraq maye suyun varlığına şərait yarada bilər. Yer kürəsi də geoloji keçmişində bir neçə dəfə bənzər "qar topu" mərhələlərindən keçdiyi üçün, bu vəziyyət həyatın tamamilə qeyri-mümkün olması mənasına gəlmir.
Planetin varlığını dəqiqləşdirmək üçün daha çox müşahidə aparılmalıdır. Ekspertlər bu kəşfin Yer bənzəri planetlərin aşkar edilməsi texnologiyamızda mühüm bir mərhələ olduğunu bildirirlər. Gələcək tədqiqatlar üçün Avropa Kosmik Agentliyinin (ESA) PLATO kimi yeni nəsil teleskoplarından istifadə olunacaq.
