İspaniyada birinci xanım üçün 24 il həbs tələbi
İspaniya Baş naziri Pedro Sançesin həyat yoldaşı Mariya Beqona Qomes Fernandes haqqında davam edən istintaqda gərginlik artıb.
AFN.az xəbər verir ki, ifrat sağçı "Hazte Oir" Assosiasiyası Qomesin nüfuz alveri və korrupsiya cinayətlərinə görə 24 il müddətinə azadlıqdan məhrum edilməsi tələbi ilə çıxış edib. Təşkilat Sançesin baş nazir olmasından sonra həyat yoldaşının siyasi gücündən istifadə edərək şəxsi maraqları üçün işlər gördüyünü iddia edərək, onu nüfuzdan istifadə etmə, biznes sahəsində korrupsiya, mənimsəmə və vəzifə səlahiyyətlərindən sui-istifadədə ittiham edir.
İfrat sağçı və radikal katolik görüşləri ilə tanınan assosiasiya, həmçinin Qomesin cinayət tərkibli işlərinə kömək etdiyi iddiası ilə Baş nazirlik tərəfindən ona köməkçi təyin edilən Kristina Alvaresin 22 il, iş adamı Xuan Karlos Barrabesin isə 6 il həbs cəzası ilə mühakimə olunmasını istəyib.
Məhkəməyə təqdim edilən ittihamnamədə 2018-ci ildən etibarən Beqona Qomesin həm dövlət, həm də özəl sektora təsir imkanlarının artdığı, şəxsi əlaqələri sayəsində iri şirkətlərin rəhbərlərinə çıxış əldə etdiyi və dövlət resurslarından istifadə etdiyi irəli sürülür. İddiaları qətiyyətlə rədd edən Qomes isə hakim Xuan Karlos Peinado tərəfindən aparılan təhqiqatla bağlı Madrid Vilayət Məhkəməsinə şikayət edərək, istintaqın dayandırılmasını tələb edib.
Hökumət nümayəndələri 2025-ci ildən bəri davam edən bu prosesin müxalifətdəki ifrat sağçı "Vox" partiyası ilə əlaqəli və siyasi xarakterli olduğunu bildiriblər. Baş nazir Sançes isə məsələ ilə bağlı son açıqlamasında ədalətin bərqərar olacağına inandığını qeyd edib.
Qeyd edək ki, Qomesə qarşı ilk ittihamlar 2024-cü ilin aprelində "Manos Limpias" dərnəyi tərəfindən irəli sürülmüşdü.
