FIFA İranla bağlı qəti qərarını verdi
FIFA prezidenti Canni İnfantino təhlükəsizlik narahatlıqları səbəbindən turnirdən çəkilmə ehtimalı gündəmdə olan İranın 2026-cı il Dünya Çempionatına planlaşdırıldığı kimi qatılacağını açıqlayıb.
AFN.az xəbər verir ki, Vankuverdə keçirilən FIFA Konqresində çıxış edən İnfantino İranın ABŞ-dakı matçlarda da meydana çıxacağını qətiyyətlə təsdiqləyib.
11 iyun - 19 iyul tarixləri arasında ABŞ, Kanada və Meksikanın ortaq ev sahibliyi ilə keçiriləcək turnirdə İran iyunun 15-də Kaliforniyada Yeni Zelandiya, iyunun 21-də Belçika və iyunun 26-da Sietlda Misir yığması ilə qarşılaşacaq.
Qeyd edək ki, İranın idman naziri Əhməd Dünyamali mart ayında verdiyi açıqlamada oyunçuların təhlükəsizliyinə təminat verilə bilməyəcəyini əsas gətirərək turnirdə iştirakın qeyri-mümkün olduğunu bildirmişdi. Bu müddət ərzində İnfantino məsələni birbaşa Donald Tramp administrasiyası ilə müzakirə edərək İranın turnirdə yer alması üçün intensiv diplomatiya yürüdüb.
Dünya Çempionatındakı İran böhranı fevral ayında ABŞ və İsrailin İrana yönəlik hava əməliyyatları və İran lideri Ayətullah Əli Xameneinin öldürülməsindən sonra daha da kəskinləşmişdi. İran Futbol Federasiyası və İdman Nazirliyi hücumlardan sonra ABŞ-da təşkil olunan turnirdə iştirak etməyin uyğun olmadığını müdafiə edərək geri çəkilmə siqnalları vermişdi.
Hətta İranın yerinə turnirə vəsiqə qazana bilməyən İtaliyanın daxil edilməsi kimi variantlar müzakirə olunsa da, FIFA bu təklifi rədd edərək İranın iştirakında israr edib. İnfantinonun son açıqlaması ilə İranın turnirdəki yeri rəsmiləşsə də, ABŞ rəhbərliyinin İran nümayəndə heyətinə tətbiq edəcəyi viza yoxlamaları və stadionlardakı təhlükəsizlik tədbirlərinin turnir başlayana qədər həssas mövzu olaraq qalacağı gözlənilir.
