İspaniyadan Avropa ordusu çağırışı
İspaniyanın xarici işlər naziri Xose Manuel Albares Avropa İttifaqının müdafiə sahəsində ABŞ-dan asılılığını azaltmaq üçün öz ordusunu yaratmalı olduğunu bildirib.
AFN.az xəbər verir ki, o, Avropa ölkələrinin təhlükəsizlik məsələlərində daha müstəqil hərəkət etməsinin vacibliyini vurğulayıb.
Brüsseldə keçirilən Xarici İşlər Şurasının iclası öncəsi açıqlama verən Albares bildirib ki, ABŞ Prezidenti Donald Trampın NATO ittifaqına yönəlmiş tənqidlərindən sonra Avropa ölkələri Rusiya kimi aktorların Vaşinqtonun köməyə gəlib-gəlməyəcəyini yoxlaması ehtimalına qarşı hazır olmalıdır. O qeyd edib ki, “hər səhər ABŞ-ın növbəti addımının nə olacağını düşünərək oyanmaq olmaz”.
İspaniya XİN rəhbəri müstəqil müdafiə gücünün NATO-nu zəiflətməyəcəyini də vurğulayıb. Onun sözlərinə görə, ABŞ-ın öz ordusunu gücləndirməsi də alyansa zərər vermir. Albares əlavə edib ki, NATO-nun təmin etdiyi çəkindiricilik yenidən bərpa edilməlidir və əgər alyans əvvəlki səviyyədə təhlükəsizlik təmin edə bilmirsə, avropalılar daha çox məsuliyyət götürməlidirlər.
Xose Manuel Albares bildirib ki, ABŞ avropalıların tarixi və təbii müttəfiqi olaraq qalır, lakin Tramp administrasiyasının transatlantik münasibətlərə dair yeni ideya və baxışlara malik olduğunu qəbul etmək lazımdır.
Gərginliyin Almaniya kansleri Fridrix Mertsin İranla aparılan danışıqlarla bağlı açıqlamalarından sonra artdığı qeyd olunur. Bundan sonra Tramp bu ayın əvvəlində Almaniyadan 5 min ABŞ hərbçisinin çıxarılması qərarını verib.
İspaniya Yaxın Şərqdəki hadisələr və Tramp administrasiyasının siyasəti ilə bağlı Avropa daxilində ən sərt tənqidləri səsləndirən ölkələrdən biri kimi diqqət çəkir. Avropa ordusu ideyası Trampın NATO-dan çıxmaq təhdidləri və Danimarkanın ərazisi olan Qrenlandiya ilə bağlı bəyanatlarından sonra Brüsseldə yenidən əsas müzakirə mövzusuna çevrilib.
