SOCAR-ın Levan Davitaşvili təyinatı: Şirkətin özünə verdiyi ən sərt tənqid
SOCAR-ın beynəlxalq bazarlarda genişlənmə strategiyası bu dəfə yeni və diqqətçəkən təyinatla gündəmə gəlib.
AFN.az xəbər verir ki, İtaliyanın “İtaliana Petroli” (IP) enerji şirkətinin nəzarət paketinin alınmasından sonra quruma rəhbər vəzifəyə Gürcüstanın keçmiş iqtisadiyyat naziri və baş nazirin sabiq müavini Levan Davitaşvilinin gətirilməsi müxtəlif suallar yaradıb. Məsələ daha çox iqtisadi tərəfdən yox, idarəetmə və kadr siyasəti baxımından müzakirə olunur. Burada xüsusilə iki məqam diqqət çəkir: yerli kadr potensialına münasibət və keçmiş siyasi fiqurların iri biznes strukturlarına transferi.
SOCAR illərdir Azərbaycanın ən böyük maliyyə və insan resurslarına malik qurumlarından biri hesab olunur. Şirkət xaricdə təhsil proqramları, daxili təlimlər və beynəlxalq tərəfdaşlarla əməkdaşlıq vasitəsilə minlərlə mütəxəssis yetişdirib. Bu baxımdan sual yaranır: əgər SOCAR-ın öz daxilində müxtəlif ölkələrdə iri layihələri idarə edən peşəkar kadrlar varsa, niyə İtaliyadakı strateji aktivin rəhbərliyi yerli menecerə həvalə olunmur?
SOCAR illərdir xaricdə təhsil proqramları, daxili akademiyalar və beynəlxalq tərəfdaşlıqlar vasitəsilə kadr hazırlığına ciddi vəsait yatırdığını vurğulayır. Şirkətin 2006-cı ildən fəaliyyət göstərən Xarici Təqaüd Proqramı çərçivəsində əməkdaşların dünyanın nüfuzlu universitetlərində təhsil alması maliyyələşdirilir; proqram çərçivəsində təhsil haqqı, yaşayış, nəqliyyat və digər xərclər qarşılanır. Bu istiqamətdə ümumilikdə ölkə üzrə yüz milyonlarla manat vəsait xərclənib. Belə olan halda, SOCAR-ın uzun illər ərzində formalaşdırdığı bu kadr potensialının İtaliya kimi strateji bazarda rəhbər səviyyədə görünməməsi istər-istəməz sual yaradır. Şirkətin Türkiyə və İsveçrədə topladığı beynəlxalq idarəçilik təcrübəsi də nəzərə alınanda, bu qədər resurs və hazırlıq fonunda xaricdəki əsas aktivlərə yenə kənardan siyasi fiqurların gətirilməsi daxili kadr siyasəti ilə bağlı müzakirələri daha da artırır.
Levan Davitaşvilinin təyinatı başqa aspektdən də diqqət çəkir. O, Gürcüstan hökumətində çalışdığı dövrdə Azərbaycan qazının tranziti və SOCAR-ın bu ölkədəki fəaliyyəti ilə bağlı əsas qərarverici şəxslərdən biri idi. Hökumətdən ayrıldıqdan qısa müddət sonra əvvəlcə SOCAR prezidentinin müşaviri, daha sonra isə İtaliyadakı aktivə rəhbər təyin olunması müəyyən suallar yaradır. Beynəlxalq praktikada bu cür keçidlər bəzən maraqlar toqquşması baxımından da müzakirə edilir.
Bundan başqa, “İtaliana Petroli” kimi rəqabətli bazarda fəaliyyət göstərən şirkət üçün yalnız siyasi əlaqələr deyil, sektor və bazar təcrübəsi də mühüm amildir. İdarəetmədə siyasi keçmişi olan şəxslərə üstünlük verilməsi uzunmüddətli perspektivdə iqtisadi səmərəliliklə bağlı müzakirələrə səbəb ola bilər.
Xəbərdə Davitaşvilinin Kulevi neft emalı zavodu layihəsində roluna da toxunulur. Bu isə SOCAR-ın bəzi strateji layihələrdə müəyyən şəxslərə nə dərəcədə önəm verdiyi ilə bağlı əlavə suallar yaradır.
SOCAR-ın İtaliya bazarındakı uğuru Azərbaycan üçün əhəmiyyətlidir. Amma bu uğurun əsasən xarici siyasi fiqurlar üzərindən qurulması şirkətin korporativ müstəqilliyi ilə bağlı müzakirələri artırır. Uzun illər beynəlxalq fəaliyyət göstərən və böyük idarəçilik təcrübəsinə malik bir qurumun belə strateji vəzifələr üçün öz daxilindən kadr yetişdirə bilmədiyi barədə fikir formalaşması, əslində şirkətin özü üçün də ciddi reputasiya məsələsinə çevrilə bilər. Yerli mütəxəssislər illərlə sistemdə çalışıb təcrübə topladığı halda, əsas idarəetmə postlarının siyasi keçmişi olan şəxslərə verilməsi SOCAR-ın milli şirkət imicindən çox, siyasi təsir aləti kimi görünməsinə səbəb ola bilər.
