ABŞ təyyarələri İran sazişinin hazırlıqları üçün Avropaya hərəkət etdi
ABŞ Hərbi Hava Qüvvələrinə məxsus təyyarələrin İranla sülh sazişinin hazırlıqları çərçivəsində Avropaya doğru yola düşdüyü iddia edilib.
AFN.az xəbər verir ki, "Axios" nəşrinin mövzuya yaxın mənbələrə istinadən yaydığı xəbərə görə, hərbi uçuşlardakı bu hərəkətlilik İranla razılıq əldə olunacağı təqdirdə yaxın günlərdə Cenevrədə baş tuta biləcək imza mərasimi ilə birbaşa bağlıdır.
Adının açıqlanmasını istəməyən mənbələr ABŞ Hərbi Hava Qüvvələrinə aid dörd ədəd "C-17" tipli nəqliyyat təyyarəsinin vitse-prezident Ceyms Devid Vensin ABŞ ilə İran arasındakı mümkün sazişin imzalanması məqsədilə Cenevrəyə edəcəyi səfərin hazırlıqları çərçivəsində dünən Avropaya hərəkət etdiyini irəli sürüb.
Sözügedən iddia Prezident Donald Trampın dünən Vaşinqton ilə Tehranın böyük bir kompromisə nail olduğunu və bu həftə sonu sazişin imzalana biləcəyini bəyan etməsindən sonra gündəmə gəlib.
Əldə olunan memorandumun layihə mətninə əsasən, mövcud atəşkəs daha 60 gün müddətinə uzadılacaq, Hörmüz boğazı hər hansı bir tranzit rüsumu tələb olunmadan dərhal yenidən naviqasiyaya açılacaq və gəmi hərəkətliliyinin 30 gün ərzində müharibədən əvvəlki səviyyəyə çatdırılması hədəflənəcək.
Bundan əlavə, İranın nüvə silahı inkişaf etdirməyəcəyinə dair öhdəlik götürməsi və zənginləşdirilmiş uran ehtiyatı ilə bağlı narahatlıqları aradan qaldırması gözlənilən sənəd layihəsinə görə, nüvə proqramı ilə bağlı əsas fundamental addımların atılması isə ayrıca və daha genişmiqyaslı bir müqaviləyə saxlanılacaq.
Memorandumdakı öhdəliklərin yerinə yetirilməsindən asılı olaraq İrana neft ixracı üçün müvəqqəti icazələr də daxil olmaqla, mərhələli şəkildə sanksiyalardan azad olma imkanları yaradılacaq.
Digər tərəfdən, saziş layihəsinin Qətərin vasitəçisi Əli Əl-Tavadi ilə İranın xarici işlər naziri Abbas Əraqçi arasındakı danışıqlar nəticəsində formalaşdığı, proses zamanı Trampın Yaxın Şərq üzrə xüsusi nümayəndəsi Stiv Vitkoff və kürəkəni Cared Kuşnerin də fəal iştirak etdiyi bildirilir.
Lakin sazişin Qətər və Pakistanın vasitəçilik rolunu əks etdirəcək şəkildə "İslamabad Anlaşması" adı ilə tanınması gözlənilir.
İran Xarici İşlər Nazirliyi isə Tehranın təklif olunan sazişlə bağlı hələ yekun qərar vermədiyini açıqlayıb.
Tramp dünən Oval Ofisdə etdiyi çıxışında sazişin əldə olunmasındakı töhfələrinə görə Türkiyəni yüksək qiymətləndirib, Prezident Rəcəb Tayyib Ərdoğanla görüşdüyünü və onun bu prosesdəki dəstəyinin mükəmməl olduğunu ifadə edib.
