Mərkəzi Gömrük Hospitalı ləğv edilmiş tenderi yenidən elan etdi
Azərbaycan Respublikasının Dövlət Gömrük Komitəsinin Tibbi Xidmət İdarəsinin Mərkəzi Hospitalı sterilizasiya avadanlıqlarının satın alınması ilə bağlı açıq tenderi yenidən elan edib.
AFN.az xəbər verir ki, satınalma "Azərbaycan Respublikasının Dövlət Gömrük Komitəsinin Tibbi Xidmət İdarəsinin Mərkəzi Hospitalı tərəfindən sterilizasiya avadanlıqlarının satın alınması" adı altında həyata keçiriləcək.
Tender çərçivəsində "Avtoklav və sterilizator avadanlığı və aksesuarları" təsnifat koduna aid məhsulların alınması nəzərdə tutulur. Satınalmanın ehtimal olunan qiyməti 368 489,63 manat təşkil edir.
Müsabiqə 5 avqust 2026-cı il saat 13:17-də elan olunub. Təkliflərin son təqdim olunma tarixi 27 avqust 2026-cı il saat 15:00, zərflərin açılışı isə həmin gün və saatda keçiriləcək.
Qeyd edək ki, Mərkəzi Hospital eyni predmet üzrə keçirilmiş əvvəlki açıq tenderin nəticələrinin Antiinhisar və İstehlak Bazarına Nəzarət Dövlət Agentliyinin 1 iyul 2026-cı il tarixli AİBNDA/SQ-6198/2026 nömrəli qərarı ilə ləğv edildiyini açıqlamışdı. Yeni tender həmin satınalma prosedurunun yenidən həyata keçirilməsi məqsədilə elan olunub.
Xatırladaq ki, əvvəlki tenderin hansı əsaslarla ləğv edildiyi, eləcə də yeni elan olunan müsabiqədə texniki şərtlərdə və ya digər satınalma sənədlərində hər hansı dəyişiklik edilib-edilmədiyi barədə hələlik rəsmi məlumat açıqlanmayıb.
