Tam Günəş tutulmasını hansı ölkələrdən izləmək mümkün olacaq?
Şimal yarımkürəsinin müəyyən bölgələrində gündüzü alatoranlığa çevirəcək 12 avqust 2026-cı il tarixli tam Günəş tutulmasını Qrenlandiya, İslandiya və İspaniya da daxil olmaqla, məhdud bir xətt üzərindən tam şəkildə izləmək mümkün olacaq. Avropanın böyük hissəsi isə bu göy hadisəsinin şahidi qismən tutulma şəklində olacaq.
AFN.az xəbər verir ki, Şimal yarımkürəsində böyük maraqla gözlənilən 12 avqust 2026-cı il tarixli tam Günəş tutulması təbiət həvəskarlarına səmada möhtəşəm mənzərə təqdim etməyə hazırlaşır.
Ayın Günəşi tamamilə örtəcəyi tam tutulma xətti Arktik okeanı üzərində başlayaraq şərqi Qrenlandiya, qərbi İslandiya və İspaniyanın şimalından keçdikdən sonra Balear adaları üzərindən Aralıq dənizinə çataraq sona çatacaq.
Təxminən 293 kilometr genişliyində olan bu dar xətt üzərində yerləşən müşahidəçilər gündüzün qısa müddətə gecəyə çevrilməsinin şahidi olacaqlar. Ayın Günəşi tamamilə örtdüyü bu anlarda Günəşin xarici atmosferi olan tac təbəqəsi xüsusi avadanlıq olmadan çılpaq gözlə görünə biləcək.
Tam tutulma xəttindən kənarda qalan geniş coğrafiyada isə təsirli qismən Günəş tutulması müşahidə olunacaq. İngiltərə, İrlandiya, Fransa, Almaniya, İtaliya və Skandinaviya ölkələri də daxil olmaqla, Avropanın böyük hissəsində Ay Günəşin qarşısından keçərək nəzərəçarpacaq qaralma yaradacaq.
Göy hadisəsini yerində izləmək istəyənlər üçün İspaniyanın şimalı ən çox seçilən marşrutlardan biri kimi önə çıxır.
Asan əlçatanlığı və tutulmanın gün batımına yaxın baş verəcək olması İspaniyada açıqca göz oxşayan görüntülər yaradacaq.
Qrenlandiya və İslandiya isə tutulmanın səmada daha yüksək mövqedə baş verəcəyi Arktika mənzərələri ilə daha fərqli atmosfer vəd edir.
Müşahidənin aparıldığı yerin harası olmasından asılı olmayaraq, lazımi qoruyucu vasitələr olmadan Günəşə birbaşa baxmağın təhlükəli olduğu vurğulanır.
Tutulmanın qismən mərhələləri boyunca sertifikatlaşdırılmış Günəş tutulması eynəklərindən və ya teleskop, durbin və kameralara taxılan xüsusi filtrlərdən istifadə etmək lazımdır.
Qoruyucu eynəklər yalnız Ayın Günəşi tamamilə örtdüyü həmin qısa tam tutulma anında təhlükəsiz şəkildə çıxarıla bilər.
